Արփի Բեգլարյան, Sputnik.
Քաղաքացիներից բազմաթիվ ահազանգեր ստացած կենդանասերների «Դինգո թիմ» կազմակերպությունը հանրային վիրահատություն էր կազմակերպել` ապացուցելու համար, որ «Յունիգրաֆ իքսի» կողմից «ստերջացված» շները ոչ միայն ստերջացված չեն, այլև գտնվում են անմխիթար վիճակում։
Հիշեցնենք, որ օրերս փողոցային կենդանիների վնասազերծմամբ զբաղվող «Յունիգրաֆ իքս» կազմակերպությունը Երևանի փողոցներ է բաց թողել 40 ստերջացված շուն, որոնք ունեցել են համապատասխան դեղին և նարնջագույն վզկապներ: Ամեն ինչ լավ կլիներ, եթե կենդանիներն իսկապես լինեին ստերջացված ու առողջ:
«Մենք ստացել ենք բազմաթիվ ահազանգեր թե՛ կենդանասեր, թե՛ ոչ կենդանասեր բնակիչներից, ովքեր նշում էին, որ քաղաքի տարբեր հատվածներում բաց են թողնվել դեղին ու նարնջագույն վզկապներով, շատ վատ վիճակում գտնվող շներ, որոնց հնարավոր չէր բռնել. նրանք այնքան վախեցած էին, որ ոչ ոքի մոտ չէին թողնում, անգամ մեզ են կծել, ինչը նրանց վիճակում հասկանալի է»,- Sputnik Արմենիայի հետ զրույցում նշեց «Դինգո թիմի» անդամ Գոհար Մանուշակյանը:
Նրա խոսքով` թիմը գնացել է ահազանգերի հետքերով ու մեծ դժվարությամբ բռնել 7 բաց թողնված շան, որոնց տեղափոխել է անասնաբուժական կլինիկա:
Մեր ներկայությամբ անասնաբույժներ Լևոնն ու Արսենը վիրահատում էին շներից մեկին, որն օրենքով պետք է ստերջացված լիներ։
««Յունիգրաֆ իքսի» կողմից կատարված ստերջացումը, եթե կարելի է դա այդպես անվանել, կատարվել է բոլոր վիրահատական նորմերն ու կանոնները խախտելով. վիրահատելուց առաջ կենդանու փորը չի սափրվել, բացվածքն արվել է սխալ տեղից, բացի այդ կենդանուն ընդհանրապես չեն ստերջացրել՝ բացվել է միայն փորի վերին շերտը, ոչ մկան է հեռացվել, ոչ արգանդ, ոչ ձվարան: Այսինքն` 2-3 ամսից շունը նորից զույգվելու է ու ձագեր է ունենալու, «Յունիգրաֆ իքսն» էլ ձագերին տանելու է ու գլխաքանակի համար նորից պետբյուջեից գումարներ է ստանալու»,- նշեց մեր զրուցակիցը:
Նշենք, որ «Յունիգրաֆ իքս» կազմակերպությունը շների վնասազերծման համար մինչև 2015թ. տարեկան պետբյուջեից ստանում էր 240 մլն դրամ (կես միլիոն դոլար):
Շան ստերջացումը «Դինգո թիմն» իրականացնում էր լրագրողների ներկայությամբ, և մինչ մենք զրուցում էինք Գոհարի հետ, անասնաբույժ Լևոնը հրավիրեց բոլորիս ուշադրությունը։
«Կամ շան արգանդը հետ է աճել, կամ «Յունիգրաֆ իքսը» «հրաշքներ է գործում». պարզվում է` շունը ոչ միայն ստերջացված չէ, այլև 2 շաբաթական հղի է: Մնացածն արդեն չեմ մեկնաբանում»,- ապշած նշեց նա` շարունակելով գործը:
Այս փաստը ցնցեց բոլոր ներկաներին: Բայց սա դեռ վերջը չէր։ Շներից մի քանիսը, որոնք վանդակներում սպասում էին իրենց հերթին, Գոհար Մանուշակյանի խոսքով` վարակված են ժանտախտով, ինչի պատճառը «Յունիգրաֆ իքսի» ոչ ախտահարված ավտոմեքենան է, որով իրականացվում է որսը։
«Մեքենայում վիրուսն արդեն կա, ու բաց թողնված շները վտանգ են ներկայացնում նաև ընտանի կենդանիների համար: Սա ապացուցում է, որ «Յունիգրաֆ իքսն» արդեն ոչ միայն անտուն կենդանիներին է ոչնչացնում, այլև վտանգավոր է տեր ունեցող կենդանիների համար, որոնք կարող են վարակվել: Այս շներին մենք բռնել ենք Ալեք Մանուկյան և Խանջյան փողոցների հատվածում, այսինքն` այդտեղ ժանտախտն արդեն տարածված է»,- ահազանգում է կենդանասեր Գոհարը:
Այն, որ շները բաց են թողնվել «Յունիգրաֆ իքսի» կողմից, միանշանակ է: Դա են ապացուցում դեղին և նարնջագույն վզկապները, որոնց մասին օրեր առաջ հայտարարել է հենց «Յունիգրաֆ իքսը»: Ի դեպ, Գոհար Մանուշակյանի խոսքով` վզկապներն այնքան պինդ են կապված եղել, որ մի քանի ամիս հետո շունը խեղդվելու էր, քանի որ ձագերի չափերը շատ շուտ են փոխվում:
Կենդանասերները կոչ են անում քաղաքացիներին` ուշադիր լինել, պահպանել կենդանիների հիգիենան, իսկ իշխանություններին՝ ականջալուր լինել այս կարևորագույն խնդրին, քանի որ պետության գումարները տարեցտարի անարդյունավետ մսխվում են, իսկ խնդիրը լուծում ստանալու փոխարեն գնալով սրվում է:
