ԵՐԵՎԱՆ, 10 մարտի — Sputnik. Հայաստանի ազգային հավաքականի գլխավոր մարզիչ Վարուժան Սուքիասյանը հրապարակել է արտերկրում հանդես եկող այն ֆուտբոլիստների անունները, որոնք մարտի 21-25-ը Երևանում կմասնակցեն Հայաստան-Բելառուս ընկերական հանդիպման մարզական հավաքին։
Հայաստանի ֆուտբոլի ֆեդերացիայի մամուլի ծառայության հաղորդման համաձայն` հրավիրվել են Գաել Անդոնյանը («Դիժոն», Ֆրանսիա), Հրայր Մկոյանը («Էսթեղլալ», Իրան), Հովհաննես Համբարձումյանը («Վարդար», ՆՀՀ Մակեդոնիա), Հենրիխ Մխիթարյանը («Բորուսիա», Դորտմունդ, Գերմանիա), Մարկոս Պիզելին («Ալ Ռաեդ», Սաուդյան Արաբիա), Արաս Օզբիլիսը («Ռայո Վալեկանո», Իսպանիա), Կառլեն Մկրտչյանը («Անժի», Ռուսաստան), Գոռ Մալաքյանը («Ստալ», Ուկրաինա), Էդգար Մանուչարյանը («Ուրալ», Ռուսաստան), Արթուր Սարկիսովը («Վոլգա», Ռուսաստան), Դավիթ Արշակյանը («Տրակայ», Լիտվա) և Գեղամ Կադիմյանը («Կարպատի», Ուկրաինա)։
Գոռ Մալաքյանը, Դավիթ Արշակյանը և Գեղամ Կադիմյանն առաջին անգամ են հրավիրվել Հայաստանի ազգային հավաքական:
Հայաստան-Բելառուս ընկերական հանդիպումը տեղի կունենա մարտի 25-ին Վազգեն Սարգսյանի անվան «Հանրապետական» մարզադաշտում։ Հանդիպումը հրաժեշտի խաղ կլինի հայտնի դարպասապահ Ռոման Բերեզովսկու համար հավաքականի կազմում։
Հայաստանի առաջնությունում հանդես եկող ֆուտբոլիստների ցուցակը կհրապարակվի ավելի ուշ:
