ԵՐԵՎԱՆ, 10 մարտի-Sputnik. Մարդու իրավունքների պաշտպանը Վարդգես Գասպարիի թեմայով հայտարարություն արդեն իսկ արել է։ Հայտարարությունը բաղկացած է 3 կոմպոնենտից։ Առաջինը վերաբերում է պահման պայմաններին ու տեսակցության հետ կապված խնդիրներին։
«Երկրորդը վերաբերում է Վարդգես Գասպարիի հաղորդումների հիման վրա խոշտանգման դեպքերին։ Արդեն գլխավոր դատախազի ցուցումով սկսվել է քրեական դատավարության օրենսգրքով նախատեսված վարույթ։ Երրորդը վերաբերում էր ազատությունից զրկելուն, չնայած դատական վարույթ էր, բայց ես բացառիկությունը հաշվի առնելով` փորձեցի հայտարարության մեջ որոշակի գնահատական տալ»,-ասաց Արման Թաթոյանը։
Օմբուդսմենը գլխավոր դատախազությունից դեռ պատասխան դեռ չի ստացել։ Ուստի Թաթոյանն այս պահին խուսափում է գնահատականներ տալ։ Նա հավաստիացրեց, որ եթե անգամ Գասպարին ազատ արձակվի, ապա չի նշանակում, որ պետք է մոռանալ հանցագործության մասին հաղորդումները։ Դրանց ընթացք տալը Թաթոյանն անհրաժեշտ է համարում։
Ընդդիմադիր ակտիվիստ Վարդգես Գասպարին ձերբակալվել էր ոստիկանին և դատավորին վիրավորելու համար։ Փետրվարի 19-ին տեղափոխվել էր «Նուբարաշեն» ՔԿՀ, որտեղ մինչև փետրվարի 22-ը կարանտինի մեջ էր եղել, որից հետո նրան տեղափոխել էին բանտախուց, այնուհետև` հոգեբուժական հիվանդանոց։ Վարդգես Գասպարին ազատ է արձակվել մարտի 9-ին։
