ԵՐԵՎԱՆ, 10 մարտի-Sputnik. Էներգետիկայի և բնական պաշարների փոխնախարար Իոսիֆ Իսայանն ասաց, որ հայկական կողմը Ռուսաստանին առաջարկել է վերանայել Հայաստան մատակարարվող գազի գինը։
«Հաշվի առնելով, որ բանակցությունները շարունակվում են, պայմանավորվածություն է ձեռք բերվել մինչև 2017 թվականի առաջին եռամսյակը պահպանել նախորդ տարվա համար հաստատված` 165 դոլար գինը` 1000 խմ գազի դիմաց»,-ասաց փոխնախարարը։
«ՀՀ մատակարարվող գազի գինը կարճատև ժամանակահատվածի համար ֆիքսվել է 165 դոլար, որպեսզի բանակցություններն ընթանան արտոնյալ պայմանների շուրջ»,-կառավարության նիստից հետո պարզաբանեց արտգործնախարարի տեղակալ Շավարշ Քոչարյանը։
Հայաստանի Հանրապետության ներքին շուկայում բնական գազի մատակարարումն ու իրացումն ապահովում է «Գազպրոմ Արմենիա» ընկերությունը: Գազափոխադրման համակարգում ընկերության կողմից սպասարկվող մայրուղային գազատարերի և գազատար-ճյուղավորումների ընդհանուր երկարությունը կազմում է 1720 կմ: Գազաբաշխման համակարգում շահագործվում է 14 097 կմ բարձր,միջին և ցածր ճնշման գազատար, օժանդակ ինժեներական կառույց:
