ԵՐԵՎԱՆ, 10 մարտի —Sputnik. «Վայ, քուր ջան, մի ամաչի, թող էս շորի անունը, ասենք, յուբկա լիներ, կասեիք` յուբկա»։ Երևանյան տոնավաճառներից մեկում Վազգենը վաճառում է կանանց ներքնազգեստներ ու գիշերային հագուստներ:
«Ինչ դպրոցն ավարտել եմ, էս գործին եմ: Սկզբում հենց գալիս, տեսնում էին` տղա է վաճառողը, մի պահ կանգնում էին, հետո արդեն սովորականի պես սկսում էին առևտուր անել», — պատմում է Վազգենն ու ավելացնում.- «Կնոջ տեսքից արդեն հասկանում եմ, թե ինչպիսի ներքնազգեստ է նախընտրում ու երբեմն առանց իր հարցին սպասելու ՝ առաջարկում եմ իմ ապրանքը»:
Մեր զրույցին միջամտում է Վազգենի քույրը: Ժպտալով պատմում է` երբեմն հաճախորդները տեսնում են, որ Վազգենն այստեղ չէ, ասում են` լավ, հետո կգանք:
Քրոջ խոսքը շարունակում է Վազգենը. «Որովհետև ես ավելի լավ եմ հասկանում, տղամարդու աչքն ուրիշ է»։
Վաճառողը նկատում է, որ հայ կանայք այս վերջին տարիներին նախընտրում են առավել վառ գույներով ու էքսցենտրիկ լուծումներով ներքնազգեստներ:
«Եթե իրենց ուզածն է լինում, գինն էլ չեն հարցնում»,- ասում է նա:
Զրուցակիցներս պատմում են, որ երբեմն կնոջ գնած ներքնազգեստից կարող ես գուշակել բնավորության գծերը, օրինակ` վառ կարմիր,կանաչ կամ վառ կապույտ գույն նախընտրող կանայք ավելի ագրեսիվ են, պայքարող, իսկ մեղմ գույներ նախընտրողները՝ ավելի հանդուրժող:
Զրուցակիցներս ոչ մի կերպ չեն համաձայնվում նկարվել, բայց ասում են՝ ինչքան ուզես, կխոսենք:
Կանանց հետ գրեթե ամեն օր շփվում է նաև սիրիահայ վարսահարդար Սարգիսը, ով Հայաստան է եկել Սիրիայի Հալեպ քաղաքից 2007 թ-ին:
Առաջին անգամ այցելել է հայրենիք ու որոշել ընդմիշտ բնակություն հաստատել այստեղ: Սարգիսը և՛ Սիրիայում, և՛ Հայաստանում աշխատել է նույն մասնագիտությամբ՝ կանանց վարսահարդար: Մի քանի մասնագիտություն է փորձել, հետո նախընտրել է վարսահարդարությունը:
«Ես հասկացա, որ ոսկերչությունը իմը չէ, ինձ պետք է մի գործ, որ մարդկանց հետ շփվելու հնարավորություն լինի ու արվեստի հետ մի քիչ կապ ունենա»,- ասում է Սարգիսը:
Զրուցակիցս ասում է, որ կանանց հետ աշխատելն ավելի դժվար է, բայց` հետաքրքիր:
«Նրանց հետ աշխատելիս պետք է առավել համբերատար լինես: Մի խոսք կա` եթե ուզում ես հարստանանս, ապա կանանց հետ պետք է աշխատես»,- հումորով նկատում է Սարգիսը:
Հալեպում նրա հաճախորդների թվում և՛ արաբներ, և՛ քրիստոնյա արաբներ, և՛ քրդեր, և՛, իհարկե, հայեր են եղել: Ասում է, որ Սիրիայում կանայք ավելի քմահաճ են ու պահանջկոտ: Եթե այստեղ հարսանիք են գնում ավելի պարզ ու հասարակ սանրվածքով, ապա այնտեղ նախընտրում են բարդ ու խճճված սանրվածքները:
Ասում են` կանանց սանրվածքը կարող է նրա բնավորության խոսուն վկան լինել: Սարգիսը համամիտ է:
«Այն կանայք ու աղջիկները, ովքեր կարճ սանրվածքներ են նախընտրում, ավելի ուժեղ են, ինքնավստահ: Նույնը կարող եմ ասել գույների մասին. այն աղջիկները, ովքեր նախընտրում են առավել վառ գույներ` կարմիրին մոտ, ավելի աշխույժ են…»,- ասում է նա:
Հ.Գ. Սիրելի կանայք, եղեք միշտ ինքնատիպ ու յուրօրինակ: Իսկ կնոջ գեղեցկությունը կրկնապատկվում է, երբ նրա կողքին խելացի ու կայացած տղամարդ է լինում: Եվ ամենակարևորը` չկա ավելի հեշտ բան, քան սովորական կնոջը բացառիկ կին դարձնելը. բավական է սիրել նրան։
