Լաուրա Սարգսյան, Sputnik.
«Armenia» ավիաընկերությունը կարողացավ շուկա մուտք գործել կառավարության աջակցության շնորհիվ, Sputnik Արմենիային ասաց ընկերության բաժնետեր Թամազ Գաիաշվիլին:
Հայկական երկնքում «Armenia» ավիաընկերության ինքնաթիռների հայտնվելու մասին խոսվել ու որոշվել էր դեռ մի քանի տարի առաջ «Georgian Airways»-ի սեփականատերերի ու Հայաստանի ղեկավարության միջև կայացած հանդիպման ժամանակ։
«Հայաստանի ղեկավարության հետ մենք վաղուց ենք ծանոթ ու սերտորեն համագործակցում ենք: «Արմավիա» ընկերության սնանկացումից հետո, մոտ 3-4 տարի առաջ մենք հավաքվեցինք ու որոշեցինք ոտքի կանգնեցնել հայկական ավիացիան», — ասաց Գաիաշվիլին:
Նա նշեց, որ 3-4 տարի հետո ընկերությունը կարող է դուրս գալ ֆոնդային շուկա և ցանկացած ընկերություն կարող է բաժնետեր դառնալ:
Միևնույն ժամանակ Sputnik Արմենիայի հետ զրույցում Գաիաշվիլին հերքեց լուրերն այն մասին, թե բաժնետերերից մեկը Հայաստանի վարչապետ Հովիկ Աբրահամյանն է` ասելով, որ դրանք կեղծ լուրեր են:
Պաշտոնապես «Armenia» ավիաընկերության հիմնադիրներն են Աշոտ Թորոսյանը (51% բաժնետոմս), Թամազ Գաիաշվիլին (24%) և Ռոբերտ Հովհաննիսյանը (25%):
Ուժեղ ավիացիան հաջողության գրավականն է
«Armenia» ավիաընկերության բաժնետերերը մամուլի ասուլիսի ժամանակ հայտարարեցին, որ ավիացիայի զարգացումը կարևոր է Հայաստանի և Վրաստանի պես փոքր պետությունների համար:
Գաիաշվիլին նաև հիշեց 2008 թվականի դեպքերը, երբ «բոլոր ավիաընկերությունները միաժամանակ լքեցին վրացական շուկան, ու եթե չլիներ «Georgian Airways»-ը, վրացական ավիացիան կկործանվեր»:
Նոր ավիափոխադրող ընկերության տնօրենը նշեց, որ աշխարհագրական բարդ դիրք ունեցող Հայաստանն ուժեղ ավիացիայի կարիք ունի, իսկ հայկական ավիացիան լավ ներուժ ունի զարգացման համար: Նա չբացառեց նաև հետագայում երկրի ազգային ավիափոխադրող դառնալու հնարավորությունը:
Ներկա պահին բաժնետերերը, թեև մրցունակ ու մատչելի գներ են խոստանում, այնուհանդերձ հայտնում են, որ Հայաստանում վառելիքի բարձր գների պատճառով տոմսերի գները 20-30%–ով թանկ կլինեն, քան Վրաստանում: Միևնույն ժամանակ ընկերության ղեկավարությունը հավաստիացնում է, որ սակագները մատչելի կլինեն Հայաստանի քաղաքացիների համար, ու նրանք կկարողանան մեկնել տարբեր ուղղություններով` առանց հարևան երկրների օդանավակայաններից օգտվելու: Վերջին շրջանում հայերն իրենց գումարները տնտեսելու համար նախընտրում են այլ երկրներ մեկնել Վրաստանից:
Ավիապարկն ու աշխատակազմը
Ընկերության հիմնական պարկում կլինեն «Բոինգ» տեսակի ինքնաթիռներ (737-700, 737-800, 737-500): Ապրիլին ավիաընկերության հաշվեկշռում երեք ինքնաթիռ կլինի: Ինքնաթիռների շահագործման ամենաերկար ժամկետը չի գերազանցի 15 տարին: Հունիս-հուլիսին պարկը կհամալրվի ևս երկու օդանավով, իսկ տարեվերջին արդեն համալրված կլինի ութ ինքնաթիռով: «Armenia» ավիաընկերության գործընկերը Lufthansa ընկերությունն է, որն էլ սպասարկելու է ավիաընկերության ինքնաթիռները:
Չվերթերն իրականացվելու են ցերեկային ժամերին: Ավիապարկը համալրվելու է նաև «Գոլֆսթրիմ 450» ինքնաթիռներով, որոնք նախատեսված են vip-փոխադրումներ իրականացնելու համար:
Այս տարի Հայաստան կայցելի «Բոինգ» ընկերության փոխնախագահն ու նոր ընկերության ներկայացուցիչները, որոնց հետ պայմանագիր կստորագրվի` 2018 թվականին նոր ինքնաթիռներ գնելու վերաբերյալ:
Սկզբնական փուլում ընկերությունը կունենա 200-300 աշխատակից, սակայն հետագայում աշխատակազմը կհասնի 600-ի:
Գաիաշվիլին նշեց, որ անձնակազմը համալրվելու է տեղի կադրերով, որոնք «Արմավիայի» սնանկացումից հետո ստիպված են եղել լքել երկիրը և աշխատելու են մեկնել աֆրիկյան ու արաբական երկրներ:
Հայաստանը զրկվեց ազգային ավիափոխադրողից 2013 թվականին «Արմավիա» ընկերության սնանկացումից հետո: Հայաստանի ավիաշուկայում հայտնվեց Air Armenia ընկերությունը, որը սակայն 2014 թվականի հոկտեմբերին սնանկացավ ու դադարեցրեց ավիափոխադրումները:
Air Armenia-ի անհաջողության պատճառներից մեկը համարվեց այն, որ Հայաստանի ավիաշուկայում գերիշխող ռուսական ավիաընկերությունների ֆոնին ընկերությունը չդիմացավ մրցունակությանը։
Սակայն «Armenia»-ի ղեկավարությանն այդ փաստը չի մտահոգում, և նրանք բավական հանգիստ են վերաբերվում ռուսական խոշոր ավիափոխադրողների ներկայությանը` հիշեցնելով, որ իրենք 23 տարվա փորձ ունեն վրացական շուկայում:
«Մենք աշխատանքի մեծ փորձ ունենք, և չենք վախենում մրցակցությունից ու բարդություններից», — նշեց Գաիաշվիլին:
Արդեն ապրիլից ավիաընկերությունը կսկսի չվերթեր իրականացնել դեպի Ռուսաստան, Իրան, Անգլիա, Իսրայել, Չեխիա, Իսպանիա և Կիպրոս: Հետագայում չվերթերի աշխարհագրությունը կընդլայնվի:
