ԵՐԵՎԱՆ, 10 մարտի — Sputnik. Հունաստանի ծայրահեղ աջակողմյան «Ոսկե լուսաբաց» կուսակցությունից եվրապատգամավոր Էլեֆտերիոս Սինադինոսին դուրս են արել լիագումար նիստից` ռասիստական արտահայտությունների համար։
Եվրախորհրդարանի ողջ պատմության ընթացքում առաջին անգամ եվրապատգամավորը ստիպված է եղել լքել լիագումար նիստը, նշում է iefimerida.gr պարբերականը։
Պատճառը փախստականների մասին Սինադինոսի ելույթն է, որի ընթացքում նա հայտարարել է, որ «ինչպես գրում էին օտոմանյան գիտնականները, թուրքերը բարբարոս են, նրանք կեղտոտ են, նման են շների, որոնք հաչում են, երբ հակառակորդը նահանջում է»։
«Այստեղ փորձ է արվում անցնել թույլատրելիի սահմանը, որպեսի թույլատրելի լինի ռասիզմը։ Իմ դեպքում դա չի անցնի», — հայտնել է Եվրախորհրդարանի նախագահ Մարտին Շուլցն ու առաջարկել է եվրապատգամավորին անմիջապես լքել նիստը։
Շուլցը մեջբերել է Եվրամիության 165-րդ հոդվածը, որի համաձայն` խոսքը մարդու իրավունքների կոպիտ խախտման մասին է։
Եվրապատգամավորի գործընկերների բողոքին ի պատասխան` Շուլցը հայտնել է, որ «երբ անհապաղ միջոցներ են ձեռնարկվում, քննարկումներ չեն անցկացվում», ու պահանջել է Սինադինոսից` անմիջապես հեռանալ։
Շատ եվրապատգամավորներ բջջային հեռախոսներով նկարահանել են, թե ինչպես է Սինադինոսը անվտանգության աշխատակցի ուղեկցությամբ լքում լիագումար նիստը։
