Խաչիկ Չախոյան, Sputnik.
Մարզաձևի մասսայականացմանը, անկասկած, նոր թափ կհաղորդի Բիզնես լիգայի ստեղծումը: Ռուբեն Նազարեթյանը, կազմակերպելով այս մրցաշարը, հեռու գնացող նպատակներ է հետապնդում: Ներկայացնում ենք Հայաստանի ազգային հավաքականի գլխավոր մարզիչ և Բիզնես լիգայի կազմակերպիչ Ռուբեն Նազարեթյանի հետ հարցազրույցը։
-Պարոն Նազարեթյան, նախ սկսենք Հայաստանի առաջնությունից, որին յոթ թիմ է մասնակցում: Արդյո՞ք դա բավարարում է ձեզ` որպես հավաքականի գլխավոր մարզչի:
— Իհարկե, չի բավարարում: Ուժեղ հավաքական ունենալու համար յոթ թիմերի առկայությունը ավելի շատ խոսում է պրոբլեմների, քան հաջողությունների մասին: Առավել ևս, որ այդ յոթ թիմից միայն չորսն է կիսապրոֆեսիոնալ: Հայաստանի հավաքականը կազմավորելու ընթացքում պետք է մարզիչը խաղացողների ընտրության մեծ հնարավորություն ունենա: Իսկ այս պայմաններում, ինչպես հասկանում եք, ֆուտբոլիստների ընտրության հարցում այնքան էլ մեծ շանսեր մենք չունենք:
-Հիմնադրվել է Բիզնես լիգա: Ի՞նչ նպատակ է հետապնդելու այս լիգայի մրցաշարը:
— Առաջին հերթին ֆուտզալի մասսայականացման խնդիրն է, որը ուզում ենք ապահովել, և, բացի այդ էլ, ես համոզված եմ, որ այս մրցաշարում մենք նոր ֆուտբոլիստներ կտեսնենք, նոր մտահաղացումներ կառաջանան: Մենք քանակի մեջ փորձելու ենք որակ գտնել ու հետո արդյունք ապահովել:
-Մրցումների կազմակերպիչն ու անցկացողը ո՞վ է հանդիսանալու:
Մրցումների կազմակերպիչն ու անցկացնողը ես եմ, բայց բնականաբար միայնակ չեմ այդ գործում: Ֆուտզալը Հայաստանում սիրված մարզաձև է, պարզապես պետք է նոր ուղիներ փնտրել դեպի զարգացում:
-Իսկ մասնակցության հայտեր արդեն ստացե՞լ եք:
— Իհարկե, ստացել ենք: Արդեն 30 թիմ մասնակցելու հայտ է ներկայացրել: Մրցաշարն անցկացվելու է երկու խմբում: Նաև նշեմ, որ հայտեր դեռ ընդունում ենք, այնպես, որ թիմերի քանակը կարող է ավելանալ:
-Ըստ ձեզ ինչքանո՞վ է կապված ֆուտզալը ֆուտբոլի հետ:
— Շատերն ասում են, որ մեծ ու փոքր եղբայրներ են: Իրականում շատ մեծ սերտ կապ կա երկու մարզաձևերի միջև: Պարզ է, որ յուրաքանչյուրն ունի իր առանձնահատկությունները, բայց իմ կարծիքով ֆուտզալը հանդիսանում է ֆուտբոլի հիմքը: Ֆուտզալը շատ դինամիկ ու տեխնիկապես հագեցված խաղ է: Ու ես համոզված եմ, որ այս մարզաձևը շատ լավ նոր մոտեցումներ է տալիս ֆուտբոլին բոլոր առումներով: Ֆուտզալում շատ լավ զարգացած են խաղացողների արագ գործողություններն ու մտածելը, գնդակով և առանց գնդակի տեղաշարժերը, ֆիզիկական բարձր վարպետություն է պահանջվում: Եվ, անկասկած, նաև բարձր մակարդակի վրա պետք է լինի տեխնիկական պատրաստականությունը: Այսինքն` մեր մարզաձևը խաղացողների մոտ զարգացնում է այն որակները, որոնք հարկավոր են մեծ ֆուտբոլ խաղալու համար:
-Ի՞նչ ակնկալիքներ ունեք Բիզնես լիգայից:
— Ես ուզում եմ կապ ստեղծել Բիզնես լիգայի և բարձրագույն լիգայի միջև: Նկատի ունեմ և թիմերի միջև համագործակցությունը և ֆուտբոլիստների տեղափոխությունները: Բիզնես լիգայում աչքի ընկած ֆուտբոլիստները բարձրագույն խմբում խաղալու հնարավորություն կստանան: Իսկ առավել հեռանկարային խաղացողներին կարելի է արդեն փորձարկել նաև հավաքականում: Կարճ ասած՝ մեծ հույսեր ունեմ, նպատակներ կան, որոնց հասնելու համար չենք խուսափելու աշխատելուց:
-Մրցումների անցկացման հովանավորներ ունե՞ք:
— Գլխավոր հովանավորի տեղն ազատ է: Շատ ողջունելի կլինի, եթե ինչ-որ կազմակերպություն կամ անհատ միանա մեր այս հեռանկարային գործին:
-Ե՞րբ են մեկնարկելու մրցումները և մասնակիցների համար տարիքային սահմանափակում կա՞:
— Ինչպես ասացի, երկու խմբերում ենք անցկացնելու մրցումները: «B» խմբի մրցումները կմեկնարկեն մարտի 18-ից, իսկ «A» խմբում հանդիպումները կսկսվեն ապրիլ ամսից: Տարիքային սահմանափակում չկա:
