ԵՐԵՎԱՆ, 8 մարտի- Sputnik. Աշխարհի նախկին առաջին ռակետ, ռուսաստանցի Մարիա Շարապովայի գործով առաջին լսումը, ում արյան մեջ հայտնաբերվել է արգելված դեղամիջոց, տեղի կունենա մարտի 23-ին Լոնդոնում, Twitter-ի իր միկրոբլոգում հաղորդել է Sky Sports-ի լրագրող Փոլ Քելսոն:
Երկուշաբթի Մեծ սաղավարտի հինգ մրցաշարերի հաղթող Մարիա Շարապովան հայտարարել է, որ ծանուցում է ստացել այն մասին, որ իր դոպինգ թեստի ժամանակ հայտնաբերվել են մելդոնիում արգելված դեղամիջոցի հետքեր: Ավելի ուշ New York Times-ի լրագրող Քրիստոֆեր Քլերին, հղում անելով Շարապովայի փաստաբան Ջոն Հեգերթիին, հաղորդել է, որ Շարապովան ժամանակավորապես կհեռացվի մարտի 12-ին:
Մելդոնիումն ընդգրկվել է արգելված նյութերի ցուցակում Համաշխարհային դոպինգային գործակալության կողմից 2016թ.-ի հունվարի 1-ից: Այն արգելված նյութ է ինչպես մրցումների շրջանում, այնպես էլ դրանցից դուրս և դասվում է «Հորմոններ և նյութափոխանակության մոդուլյատորներ» դասին:
ԶԼՄ-ների տվյալներով, եթե ապացուցվի, որ ռուս թենիսիստուհին այդ դեղամիջոցն ընդունել է իր մարզական արդյունքները բարելավելու նպատակով, ապա նրան սպառնում է չորս տարով որակազրկում: Շարապովան հայտարարել է, որ այդ դեղամիջոցն ընդունել է 2006թ.-ից բուժման նպատակով, քանի որ նրա մոտ նկատվել է մագնեզիումի պակաս: Նա կարող է որակազրկվել ոչ թե չորս, այլ երկու տարով, եթե ապացուցվի, որ Շարապովան այդ դեղն ընդունել է բժշկական ցուցումներով:
Շարապովան հաղթանակ է տարել Մեծ Սաղավարտի բոլոր մրցաշարերում: 2004թ.-ին Շարապովան 17 տարեկան հասակում Ուիբլդոնում սենսացիոն հաղթանակ է տարել աշխարհի ներկա ռակետ Սերենա Ուիլյամսի նկատմամբ, դրան հետևել են US Open-2006-ում, Australian Open-2008-ում և 2012թ.-ին ու 2014թ.-ին «Ռոլան Գարոսում» հաղթանակները: Նա չի հաղթել միայն Օլիմպիական խաղերում:
