ԵՐԵՎԱՆ, 8 մարտի — Sputnik. Անանուն երկրպագուն, ով խաղաշրջանի սկզբին 50 ֆունտ ստերլինգ խաղադրույք է կատարել Անգլիայի առաջնությունում «Լեսթերի» հաղթանակի համար, շահել է 72 հազար ֆունտ, հաղորդում է ՌԻԱ Նովոստին՝ հղում անելով Ռոյթերսին:
«Լեսթերը» նախորդ խաղաշրջանն ավարտել է պրեմիեր լիգայում 14-րդ տեղով, ուստի ընթացիկ առաջնության մեկնարկից առաջ նրա հաղթանակի հնարավորությունը գնահատվել է 5000/1: Ինչպես նշում է Ռոյթերսը, եթե երկրպագուն սպասեր շաբաթ օրվա խաղին, նրա շահումը կհասներ 91 հազար ֆունտի:
«Ես շատ ուրախ եմ: Ես շաբաթ առավոտյան կարդացի թերթերը և մտածեցի, որ եկել է շահումը կանխիկացնելու ժամանակը: Անհամբեր սպասում եմ խաղաշրջանի ավարտին: Եթե մենք շահենք տիտղոսը, դա շատ մեծ նշանակություն կունենա, ուստի ես որոշել եմ, որ պետք չէ ժլատություն անել: Հիփոթեքս մարելուց հետո պլանավորում եմ հանգստանալ Իսպանիայում»,- ասել է երկրպագուն:
Անգլիայի առաջնությունում «Լեսթերի» հաջորդ հանդիպումը տեղի կունենա մարտի 14-ի «Նյուքասլի» հետ:
