ԵՐԵՎԱՆ, 8 մարտի — Spuntik. Գրոսմայստեր Լևոն Արոնյանն ապրիլի 18-29-ը կմասնակցի Նորվեգիայի Ստավանգեր քաղաքում կայանալիք Norway Chess – 2016 գերմրցաշարին:
Արոնյանի մրցակիցները կլինեն աշխարհի չեմպիոն, նորվեգացի Մագնուս Կարլսենը, ֆրանսիացի Մաքսիմ Վաշյե-Լագրավը, հոլանդացի Անիշ Գիրին, ռուսաստանցիներ Վլադիմիր Կրամնիկն ու Սերգեյ Կարյակինը, բուլղարացի Վեսելին Տոպալովը, հնդիկ Պենտալա Հարիկրիշնան և ուկրաինացի Պավել էլյանովը: Վերջին մասնակիցը հայտնի կդառնա ավելի ուշ:
Հիշեցնենք, որ Շախմատի Հայաստանի հավաքականի առաջատար Լևոն Արոնյանը Մոսկվայում մարտի 10-30-ը կմասնակցի ՖԻԴԵ-ի հավակնորդների մրցաշարին։
Ռուսաստանի Դաշնության մայրաքաղաքում կայանալիք մրցաշարին կմասնակցեն Հիկարու Նակամուրան, Ֆաբիանու Կարուանան, Սերգեյ Կարյակինը, Պյոտր Սվիդլերը, Վեսելին Տոպալովը, Անիշ Գիրին, Վիշի Անանդը:
Մոտ 420 հազար եվրո մրցանակային հիմնադրամ ունեցող մրցաշարի հաղթողը իրավունք կստանա նորվեգացի Մագնուս Կարլսենի հետ վիճարկել աշխարհի չեմպիոնի տիտղոսը։
