ԵՐԵՎԱՆ, 7 մարտի — Sputnik. Դիմակայության աստիճանն անցած օրերի ընթացքում մի փոքր բարձրացել է, Sputnik Արմենիային ասաց ՀՀ պաշտպանության նախարարի մամուլի քարտուղար Արծրուն Հովհաննիսյանը։
«Կրակել են 60 միլիմետրանոց ականանետերով, այլ միջոցներով կրակոցներ են եղել, բայց ընդհանուր առմամբ ոչ բարձր լարվածության աստիճան է պահպանվում»,- նշեց Հովհաննիսյանը։
Հանգստյան օրերին ղարաբաղա-ադրբեջանական հակամարտ զորքերի շփման գծում հակառակորդը տարբեր տրամաչափի հրաձգային զինատեսակներից հայ դիրքապահների ուղղությամբ արձակել է ավելի քան 1200 կրակոց։ ՊԲ առաջապահ զորամասերը հիմնականում ձեռնպահ են մնացել պատասխան գործողություններից և անհրաժեշտ քայլեր ձեռնարկել առաջնագծի ողջ երկայնքով մարտական դիրքերի պահպանությունը հուսալիորեն կազմակերպելու համար:
Կանանց միամսյակի նախաշեմին պաշտպանության նախարարի մամուլի քարտուղարը խոսեց նաև հայկական բանակում ծառայող կանանց մասին` ընդգծելով, որ հայկական Զինված ուժերում կանանց դերն ավանդաբար միշտ բարձր է եղել։
«Այսօր էլ կանանց ներգրավվածությունը թե՛ քանական, թե՛ որակական առումով բավականին առաջատար դիրքեր է զբաղեցնում աշխարհում։ Կենտրոնական ապարատի գրեթե ցանկացած օղակի շուրջ 30 տոկոսը կանայք են։ Զորքերում նրանց թիվը մոտենում է 20 տոկոսի, հատկապես հատուկ նշանակության ստորաբաժանումներում նրանց թիվը բավականին բարձր է»,- ասաց Հովհաննիսյանը։
Նա նշեց, որ երկու տարի առաջ Հայաստանի ռազմաուսումնական հաստատությունները սկսեցին աղջիկների ու կուրսանտների ընդունել։ Արդեն մի քանի տասնյակ դիմորդներ ու ուսանողներ կան, որոնք ավարտելուց հետո որպես պրոֆեսիոնալ սպաներ ծառայության կանցնեն զորքերում։ Այս պահին էլ Զինված ուժերում մեծ թվով կին հրամանատարներ կան։
