ԵՐԵՎԱՆ, 7 մարտի- Sputnik, Անի Լիպարիտյան. Խոհարարական մրցամարտը Երևանի գորգերի գործարանում էր հավաքել երկու ժողովրդի` հայերի և չինացիների ներկայացուցիչներին։
Հակադրությունն անհավանական էր` հայկական տարազներով աղջիկներ և հայկական երաժշտություն, չինական ճաշատեսակներ և հանֆու (չինական ավանդական հագուստ)։
Հայ-չինական «մենամարտը» տարբեր երկրների մշակույթների ու մարդկանց մերձեցմանն ուղղված քայլ է։ Հետագայում հայերն էլ խոհարարական ոչ պակաս հետաքրքիր մենամարտեր կկազմակերպեն` տարբեր երկրների և դեսպանատների ներկայացուցիչների մասնակցությամբ։
«Հայ-չինական խոհարարական մրցությունը, ամենից առաջ, մշակութային ժամանց է, որը թույլ է տալիս ավելի սերտ ծանոթանալ ազգային խոհանոցին և ավելի շատ իմանալ երկու եղբայր ժողովուրդների մշակույթի մասին»,- ասաց ՉՀԺ դեսպան Տյան Էրլունն ու սկսեց չինական ավանդական պելմենիներ պատրաստել։
Միջոցառման կազմակերպիչներից մեկը` Ամալյա Ակոպովան, հայտարարեց, որ մրցույթը մեկնարկեց ու որ յուրաքանչյուր խմբում 10 մարդ է ընդգրկված։
Թիմերը մեծ ոգևորությամբ սկսեցին ճաշատեսակներ պատրաստել. յուրաքանչյուրը ցանկանում էր յուրովի զարմացնել միջոցառման հյուրերին։ Իսկ նրանք, իրենց հերթին, հետաքրքրությամբ հետևում էին գործընթացին` անհամբերությամբ սպասելով այն պահին, թե երբ կճաշակեն երկու հնագույն ժողովուրդների ավանդական ուտելիքները։
Այդ ընթացքում հմայիչ չինացի աղջիկները պարում և լուսանկարվում էին հայկական գորգերի ֆոնին։
Որոշ ժամանակ անց ճաշատեսակները պատրաստ էին, հյուրերը և պրոֆեսիոնալ ժյուրին` «Հայկական խոհարարական ավանդույթների զարգացման և պահպանման» կազմակերպության նախագահ Սեդրակ Մամուլյանի գլխավորությամբ, կարողացավ համտեսել խոհարարական մրցության պտուղները։
Չինական պելմենի՞, թե՞ տոլմա։ Հավաքված հյուրերը և ժյուրին չէին շտապում գնահատական տալ։
Արդյունքում հաղթեց բարեկամությունը։ Թե՛ տոլման, թե՛ պելմենիները դուր եկան հավաքվածներին։
Միջոցառման կազմակերպիչը «Վարդանուշ տատիկ» անվանումով ընկերությունն էր, որի թիմում ընդգրկված երիտասարդներն արտասովոր տուրեր են կազմակերպում զբոսաշրջիկների համար։
