ԵՐԵՎԱՆ, 7 մարտի- Sputnik, Լաուրա Սարգսյան. Չորս երկրի երաժիշտների ելույթը մեկ բեմում նախատեսված է մարտի 9-ին երեկոյան Արամ Խաչատրյանի անվան պետական ֆիլհարմոնիայի համերգասրահում։
Դաշնակահարների և լրագրողների հանդիպումը սկսվեց անակնկալով։ Հայաստանի պետական կամերային նվագախմբի դիրիժոր Վահան Մարտիրոսյանը և Ֆրանսիայից ժամանած դաշնակահար Տրիստան Պֆֆաֆը կատարեցին Բրամսի վալսերից մեկը` իգական սեռի ներկայացուցիչներին շնորհավորելով կանանց միջազգային գալիք տոնի կապակցությամբ։
Դաշնակահարներ Տրիստան Պֆֆաֆը (Ֆրանսիա), Գլորիա Կամպաները (Իտալիա), Ֆրանսուա Գզավյե Պոազան (Շվեյցարիա) Հայաստան են ժամանել ուշ երեկոյան և լրագրողներին հետ զրույցում նշեցին, որ դեռ չեն հասցրել ծանոթանալ մեր երկրի տեսարժան վայրերին։
Ինչպես պարզվեց, նրանցից յուրաքանչյուրին Հայաստանի հետ կապում է ոչ միայն գալիք համերգը, այլ նաև` հայ ընկերները։ Օրինակ` Ժնևում ապրող Ֆրանսուա Գզավյեի հարևանները հայեր են, Գզավյեն էլ բնակվում է հայկական թաղամասում։
«Նրանք հիմա նախանձում են ինձ, չէ՞ որ ես Երևանում եմ»,- կատակում է դաշնակահարը։
Համերգն անցկացնելու գաղափարը ծնվել է Շվեյցարիայում Հայաստանի պետական կամերային նվագախմբի հյուրախաղերի ժամանակ, երբ բեմում կատարել են Բախի կոնցերտը` չորս դաշնամուրի համար։ Երևանում չորս դաշնակահարի մեկ բեմ բարձրացնելու նախաձեռնությունն առաջին անգամ իրագործվել է 2015թ.-ի նոյեմբերին։
«Ցավոք, մենք չկարողացանք կապ հաստատել Բախի հետ։ Այս անգամ նա հյուրախաղերի էր, այդ պատճառով նա առաջիկա համերգին չի մասնակցի, սակայն շատ անակնկալներ կլինեն»,- կատակեց Վահան Մարտիրոսյանը։
Չորս դաշնակահար կամ ութ ձեռք միաժամանակ կնվագեն տարբեր կոմպոզիտորների ստեղծագործությունները, ընդ որում` որոշ ստեղծագործություններ «խմբագրվել են» «Չորս դաշնամուր մեկ բեմում» նախագծի համար։
Մարտիրոսյանի խոսքով` ժամանակին Բախն է մտածել, որ չորս դաշնակահար պետք է ելույթ ունենան մեկ բեմում, և ինքն էլ ստեղծագործություն է գրել հենց այդ ձևաչափով կատարելու համար։
«Միակ բարդությունն այն է, որ բեմում պետք է չորս գործիք տեղավորել»,- նշեց Մարտիրոսյանը։
«Չորս դաշնամուր մեկ բեմում» ձևաչափով առաջին համերգը Հայաստանում անցկացվել է մեկուկես տարի առաջ։
