ԵՐԵՎԱՆ, 7 մարտի — Sputnik. Sputnik լրատվական գործակալությունը Sputnik.Փաստեր նախագծի շրջանակում տարբեր տվյալներ են հրապարակել, որոնց համաձայն` ԱՊՀ-ում կանայք ավելի շատ են կատարում որակավորում պահանջող աշխատանք, քան ԵՄ-ում։
ԱՊՀ երկրներում կանայք տղամարդկանցից 1.82 անգամ ավելի շատ են զբաղված այնպիսի աշխատանքով, որը հատուկ մասնագիտական ու բարձրագույն կրթություն է պահանջում։ ԵՄ-ում այդ ցուցանիշն ավելի ցածր է` 1.16։
ԱՊՀ երկրներում որակավորում պահանջող աշխատանքներում տղամարդկանց համեմատ կանանց ներգրավվածության մակարդակով ամենաբարձր ցուցանիշն ունի Բելառուսը` 2.66։ Առաջատար են նաև Մոլդովան ու Հայաստանը` 1.84 և 1.79` համապատասխանաբար։ Ռուսաստանը և Ուկրաինան գրեթե նույն ցուցանիշն են գրանցել` 1.77 և 1.74, իսկ ամենացածր ցուցանիշներն արձանագրվել են Ղրղըզստանում, Ղազախստանում և Ադրբեջանում` համապատասխանաբար 1.67, 1.64 և 1.47։
ԵՄ երկրների թոփ եռյակում ընդգրկվել են Լատվիան, Լիտվան ու Էստոնիան` 1.97, 1.8 և 1.64` համապատասխանաբար` առաջ անցնելով այնպիսի զարգացած եվրոպական երկրներից, ինչպիսիք են Գերմանիան (1,05), Ֆրանսիան (0,98) և Մեծ Բրիտանիան (0,97)։ Մալթան (0,77), Իտալիան (0,84) ու Լյուքսեմբուրգը (0,89) զբաղեցրել են ցուցակի վերջին հորիզոնականները` այդպիսով ցույց տալով, որ կանայք ավելի քիչ են ներգրավված մասնագիտացում պահանջող աշխատանքներում։
Sputnik լրատվական գործակալության և ռադիոյի նախագծի շրջանակում հրապարակվում են քաղաքական և սոցիալական արդիական թեմաների մասին տվյալներ, որոնք հիմնված են երկրների և կազմակերպությունների (ՄԱԿ, ԱՄՀ և այլն) վիճակագրության, ինչպես նաև խոշոր հետազոտական կենտրոնների կանխատեսումների վրա։
Sputnik-ը (sputniknews.com) լրատվական գործակալություն է և ռադիո` տասնյակ երկրներում մուլտիմեդիոն տեղեկատվական ներկայացուցչություններով: Sputnik-ը ներառում է ավելի քան 30 լեզվով կայքեր, անալոգային և թվային ռադիոհեռարձակում, բջջային հավելվածներ և էջեր սոցիալական կայքերում։ Sputnik-ի լուրերը շուրջօրյա ռեժիմով թողարկվում են անգլերեն, արաբերեն, իսպաներեն և չինարեն լեզուներով:
