ԵՐԵՎԱՆ, 7 մարտի — Sputnik. Ռեյմոնդ Թոմլինսոնի մահվան մասին հայտնել է նրա գործատու Raytheon ընկերությունը, հայտնում է Associated Press-ը։ Որպես կապի միջոց` առաջին էլեկտրոնային փոստը սկսել է գործել 1971 թվականի հոկտեմբերի 2-ին։ Հենց այդ ժամանակ է ցանցի միջոցով մարդն առաջին անգամ էլեկտրոնային նամակ ուղարկել զրուցակցին։
Ժամանակակից էլեկտրոնային փոստը լուծել է նամակների գաղտնիության հարցը, քանի որ մինչ այդ էլեկտրոնային նամակներ կարելի էր ուղարկել, սակայն դրանք ցանցին միացված բոլոր համակարգիչներից օգտվող անձանց համար հասանելի էին։
Թոմլինսոնն առաջին անգամ իր հայտնագործությունը փորձարկել է Համացանցի նախատիպ հանդիսացող ARPANET կառավարական փակ ցանցում։
Թոմլիսոնը էլեկտրոնային հաղորդագրություն ուղարկելու համար ընտրեց նաև «@» նշանը։ Հասցեն պետք է բաղկացած լիներ 2 մասից` օգտագործողի անունից և այն համակարգչի անունից, որտեղ նա գրանցված է: Որպես այդ երկու մասերը բաժանող նշան` նա վերցրեց այնպիսի նշան, որը չլիներ ոչ օգտագործողի անվան և ոչ համակարգչի անվան մեջ: Եվ այդ նշանը հենց շնիկն էր։ Raytheon ընկերության ներկայացուցիչ Ջոյս Կուզմանի կարծիքով` այս նշանը դուրս կգար օգտագործումից, եթե Թոմլիսոնը դրա համար կիրառում չգտներ։
