ԵՐԵՎԱՆ, 7 մարտի — Sputnik. «Հանուն կայուն մարդկային զարգացման» ասոցիացիայի նախագահ, բնապահպան Կարինե Դանիելյանի համոզմամբ դպրոցներին շատ մոտ կառուցվող բազմահարկ շենքերն առաջին հերթին վտանգում են հենց դպրոցում սովորող երեխաների կյանքը:
«Ամեն դպրոցի կողքին, դպրոցի գլխին ուղղակի, մի երկու մետր հեռավորությամբ բարձրահարկ շենքեր են կառուցել: Աստված մի արասցե, եթե հանկարծ մի հատ երկրաշարժ լինի, դրանք կքանդվեն ուղղակի դպրոցների գլխին»,- ասում է Կարինե Դանիելյանը` որպես օրինակ նշելով Երևանի Ամիրյան փողոցում գտնվող Չարենցի անվան թիվ 67, Բաղրամյան պողոտայի վրա գտնվող թիվ 78, Մաշտոցի պողոտայի վրա գտնվող Շահումյանի անվան թիվ 1 դպրոցները:
Բնապահպանի խոսքով, նման ծանրաբեռնվածություն գրունտի վրա թույլ տալն անընդունելի է:
Ճարտարապետ Աշոտ Ալեքսանյանը, սակայն, Կարինե Դանիելյանի մտահոգությունն այնքան էլ չի կիսում:
«Այդպիսի նորմ չկա, դպրոցը կարող է լինել շենքի մեջ էլ, վերջապես մանկապարտեզն էլ կարող է լինել շենքի մեջ՝ 7-րդ հարկում, 1-ին հարկում, նման նորմ չկա»,- մեր հարցին ի պատասխան ասաց ճարտարապետը՝ նշելով, որ այս դեպքում միակ խախտումն այն է, որ մեծ կառույցը կարող է ստվերել փոքրին, և դպրոցի շենքը կարող է զրկվել արևի բնական լույսից:
Ինչ վերաբերում է երկու կառույցների միջև թույլատրելի հեռավորության, անվտանգության գոտու առկայության պահանջին, ճարտարապետը դարձյալ շեշտեց, որ նման պահանջ հստակ սահմանված չէ, և որ յուրաքանչյուր առանձին դեպքի համար առանձին իրավիճակային որոշում է ընդունվում:
Կարինե Դանիելյանը, սակայն, պնդում է, որ խնդիրը ոչ թե շինարարական նորմերի բացակայության, այլ տվյալ կառույցների հետևում կանգնած անձանցով է պայմանավորված: Իր մտահոգությունները բնապահպանը ներկայացրել է թե՛ կառավարության անդամների և թե՛ ԱԺ պատգամավորներին, բայց սայլը տեղից չի շարժվել:
