Լաուրա Սարգսյան, Sputnik.
Արզնի գյուղում ապակե տարաների արտադրամաս կա, որտեղ աշխատանքը ոչ մի վայրկյան կանգ չի առնում: Sputnik Արմենիա պորտալը պատմում է, թե ինչպես է «ծնվում» ապակին և ինչ են պատրաստում դրանից
Արզնի գյուղում գտնվող ապակու արտադրամասում աշխատանքը ոչ մի վայրկյան չի դադարում: Աշխատանքը եռում է օրական 24 ժամ, շաբաթական 7 օր, տարին 365 օր շարունակ-
Աշխատանքային մթնոլորտը զգացվում է հենց շեմից: Հատելով գործարանի տարածք տանող սահմանագիծը՝ իսկույն հասկանում ես, որ այստեղ շոգ է լինելու: Երկու վառարանները, որոնցից մեկը դրված է կենտրոնում՝ հարթակի վրա, իսկ մյուսը՝ կողքին, ավելի ցածր մասում, աշխատում են առանց դադարի: Վառարաններում ջերմաստիճանը առնվազն 1400 աստիճան է:
Շուրջն իրարանցում է, կանայք շիկացած ապակու վրա սուրճ են եփում: Շուտով ընդմիջում է:
Տպավորություն է, թե այստեղ նույնիսկ պատերն են եռում: Չես հասկանում, թե ինչպես կարելի է աշխատել նման պայմաններում: Աշխատողներն էլ սկզբում չէին հասկանում: «Աշխատեցինք, սովորեցինք»,- ասում են գործարանի աշխատողները, հատկապես նրանք, ովքեր մշտապես աշխատում են վառարանների մոտ:
«Արդեն 15 տարի է՝ այստեղ եմ աշխատում, սովորել եմ: Առաջին օրն, իհարկե, անսովոր էր, բայց աստիճանաբար վարժվեցի: Ամեն անգամ նոր իրեր ենք պատրաստում՝ ապակե կենդանիներ, ձկներ: Նայած, թե ինչ են պատվիրում»,- ասում է ապակեգործ Արսեն Միհրանյանը:
Հեղուկ զանգվածը թեժ լավա է հիշեցնում: Վախն ու ադրենալինը խառնվում են իրար, աչքիդ առաջ են հայտնվում «Աստվածային կատակերգության» տեսարանները: Այնպիսի զգացողություն է, ասես դժոխքի 9-րդ շրջանի կենտրոնում լինես:
Այս մարդկանց կյանքը մահից բաժանված է ընդամենը մի շնչով: Վառարանից ոչ հեռու նստած են վարպետները, որոնք թեժ ապակուց կենդանիների քանդակներ են պատրաստում: Ձև ստանալու համար պետք է երկար խողովակով փչել, որի ծայրին վառարանից հանված հեղուկ ապակի է լցված: Ինչպես բացատրում են այստեղ, ապակեգործը սխալվելու իրավունք չունի: Եթե հանկարծ արտաշնչելու փոխարեն սխալվեն ու շունչ քաշեն, թոքերն անմիջապես մոխրի կվերածեն։
«Այս իրավիճակում ամենաբարդն այն է, որ ինքդ քեզ տրամադրես աշխատանքին», —ժպտալով ասում են վարպետները, որոնց միջին տարիքը տատանվում է 30-55-ի միջև:
Հմտորեն կերտված կենդանիների ֆիգուրները շիշ են ծառայում ոգելից խմիչքների համար: Դրանք կարելի է տեսնել խանութներում և շուկաներում: Գեղեցիկ շշով խմիչք գնելիս՝ մենք երբեք չենք էլ մտածում, թե այն ստեղծելու համար ինչի միջով են անցնում վարպետները:
Աշխատողների թվում նաև կանայք կան, որոնք տղամարդկանց հետ հավասար բարդ աշխատանք են կատարում: Նշում են, որ իրենց գործում ամենակարևորը զգուշությունն է, թե չէ ցանկացած պահի կարող ես այրել քեզ կամ կողքիդ կանգնածին:
18 մետրանոց հրե ճանապարհ կամ 100 րոպե. հենց այսքան ժամանակ է պետք, որ ապակե լավան վերջնական տեսք ստանա: Հետո այն ուղարկվում է Հայաստանում գործող գործարաններ կամ ԱՄՆ, Վրաստան, Ուկրաինա, Ռուսաստան, Հունաստան, Գերմանիա և այլ երկրներ՝ գինով, կոնյակով կամ այլ խմիչքներով լցվելու համար:
Գործարանը, որն ամսվա ընթացքում 15-20 մլն ապակե իր է արտադրում, գրեթե 10 տարվա պատմություն ունի:
