ԵՐԵՎԱՆ, 6 մարտի-Sputnik. Գոհար Սարգսյան. Հանդիսատեսը «Սառույցի թագավորները» շոու ծրագրին սպասում էր անհամբերությունից փայլող աչքերով: Վերջապես լույսերը վառվեցին, ու հաղորդավարը ներկայացրեց առաջին համարը՝ դուդուկ-դհոլ-ակորդեոն համադրությամբ երաժշտություն, իսկ սառույցին՝ ոչ մի գեղասահորդ:
«Կարո՞ղ է ճիշտ հասցեով չենք եկել»,- կատակեց հանդիսատեսը:
Երաժշտությունն ավարտվեց, ու սառցե շոուն քիչ-քիչ «տաքացավ»: Անվանի գեղասահորդները թեթև թռիչքներով դուրս եկան սահադաշտ, իսկ նրանց համարն ամբողջացրին Իրինա Սլուցկայան ու Եվգենի Պլյուշչենկոն:
Հանդիսատեսն առանձնահատուկ լարվածությամբ դիտեց ֆրանսիացի գեղասահորդուհու ֆանտաստիկ համարն օդ բարձրացող օղակի միջոցով: Մարի Պիեր Լերեն թեթև սահքով մտավ սահադաշտ, որից հետո իջավ օղակը: Վտանգավոր ու գեղեցիկ ելույթը հանդիսատեսին ստիպեց ճչալ զարմանքից:
«Հոգիս փառավորվեց»,- ասաց մեր կողքին նստած կինը:
Ներկաների համար ուշագրավ էր նաև կանադացի Էլաջ Բալդեի ելույթը: Սառույցին կանգնեց Մայքլ Ջեքսոն դարձած ու մի կտոր ներկայացրեց հանրահայտ լուսնային քայլվածքից:
Հանդիսատեսի արձագանքը հատկապես բուռն էր «Believe» երգի կատարման ժամանակ: Եվրատեսիլ-2009-ի հաղթական երգը ներկայացնելու համար առաջինը սահադաշտ դուրս եկավ հռչակավոր երաժիշտ Էդվին Մարտոնը՝ Անտոնիո Ստրադիվարիուսի՝ 1698 թվականին ստեղծված ջութակով: Հետո նրան միացան երգիչ Դիմա Բիլանն ու ռուս գեղասահորդ Եվգենի Պլյուշչենկոն:
«Սառույցի թագավորները» աննախադեպ շոու էր՝ օլիմպիական չեմպիոնների, աշխարհի և Եվրոպայի առաջնությունների մրցանակակիրների մասնակցությամբ: Նախագիծը միավորել էր տարբեր ուղղությունների բարձրակարգ գեղասահորդներին, որոնց թվում էին նաև հայազգի գեղասահորդներ Անատասիա Գալուստյանն ու Սլավիկ Հայրապետյանը:
3 ժամ տևած շոուն եզրափակվեց ամփոփիչ ելույթներով: Երբ Սլավիկ Հայրապետյանը պտույտ կատարեց, նրան մոտեցավ Պլյուշչենկոն ու ցույց տվեց հնարքը ճիշտ կատարելու ձևը: Ավագ գործընկերոջ խորհրդով Հայրապետյանը նույն հնարքը կատարեց 4 անգամ: Վերջում նրանք գրկախառնվեցին՝ ի նշան համաձայնության:
Հ. Գ. «Սառույցի թագավորները» շոու ծրագիրը մեկնարկեց 30 րոպե ուշացումով: Ուղիղ ժամը 19:00-ին անհամբերությունից փայլող աչքերով հանդիսատեսը սպասում էր՝ երբ կթողնեն մտնել ներս ու տեղավորվել նախատեսված տեղերում: Սակայն դռները փակ էին: Հարթակում սպասողներն այնքան էին կուտակվել, որ շարժասանդուղքներով բարձրացողներն այլևս կանգնելու տեղ չունեին: Նրանցից ոմանք անգամ սայթաքեցին ու ընկան: Թեթև իրարանցումից հետո դռները վերջապես բացվեցին:
Շոուի ավարտին մարզիկները հավաքվեցին լուսանկարվելու: Հագեցած օրվա ամփոփ պատկերը հավերժացրեց Sputnik Արմենիայի լուսանկարիչը:
