ԵՐԵՎԱՆ, 3 մարտի- Sputnik. Կապանի ոսկու հանքավայրը շահագործող «Դանդի Փրիշս մեթալս Կապան» ՓԲԸ-ն, որի սեփականատերը կանադական Dundee Precious Metals Inc ընկերությունն է, վաճառվել է ռուսական Polymetal international PLC ընկերությանը:
Հանքավայրը ձեռք բերած ընկերության պաշտոնական կայքում հրապարակված այս տեղեկատվությունը մեզ հետ զրույցում հաստատեց Dundee Precious Metals Kapan ՓԲԸ-ի գլխավոր տնօրեն Հրաչ Ջաբրայանը: Նա նաև հայտնեց, որ վաճառքի գինը կազմել է շուրջ 25 մլն ԱՄՆ դոլարը: Հանքավայրը վաճառելու պատճառների մասին Հրաչ Ջաբրայանը գերադասեց չխոսել, բայց ասաց, որ թեև 2015թ-ին ընկերությունը 25 հազար լուսաոսկի է արտադրել՝ գերազանցելով պղնձի, ցինկի և արծաթի տարեկան արտադրողական չափանիշները, բայց տարին փակել է 9 մլն դոլար վնասով:
Հրաչ Ջաբրայանը նաև հայտնեց, որ հանքավայրը վաճառելու որոշումը մեկ օրում չի կայացվել, այն երկար բանակցային գործընթաց է:
«Ձեռնարկության գործունեությամբ հետաքրքրվողները շատ են եղել: Նրանք մի քանի անգամ Կապան են այցելել, տեղում ծանոթացել արտադրությանը»,- ասաց գլխավոր տնօրենը:
Հարցին, թե ինչ փոփոխություններ են սպասվում ընկերությունում, գլխավոր տնօրենը պատասխանեց, որ իրեն կփոխարինի նոր ղեկավարը, ինքը նոր աշխատանքի կանցնի Կանադայում, իսկ ձեռնարկությունում աշխատող հայ և օտարերկրյա մասնագետներն առայժմ կշարունակեն աշխատել:
Նշենք, որ 2015թ-ին «Դանդի Փրիշս մեթալս Կապան» ՓԲԸ-ն ՀՀ խոշոր հարկատուների ցանկում 36-րդն է եղել՝ վճարելով ավելի քան 3 մլրդ 372 մլն դրամ հարկ:
Ընկերության նոր սեփականատեր Polymetal international PLC-ի տարածած հաղորդագրության համաձայն՝ 2014թ-ի դեկտեմբերի Կապանի հանքավայրի հայտնաբերված ու ենթադրվող ռեսուրսները գնահատվում են 15.9 մլն տոննա, որում առկա է 1.4 միլիոն ունիցա ոսկի, 24 մլն ունցիա արծաթ, 80 հազար տոննա պղինձ և 270 հազար տոննա ցինկ։
Նույն թվականին հանքավայրից իրացվել է 21 հազար ունցիա ոսկի, 1000 տոննա պղինձ, 5 հազար տոննա ցինկ, 0.4 մլն ունցիա արծաթ: Այդ ժամանակահատվածում ընկերության շահույթը կազմել է 35 մլն ԱՄՆ դոլար:
