ԵՐԵՎԱՆ, 5 մարտի —Sputnik, Լաուրա Սարգսյան. Նախագծի ամենակարևոր առանձնահատկությունը հարմարավետությունն է: Մետրոյում հայտնված ցանկացած մարդ կարող է իջնել նշված կայարանում և հայտնվել առևտրի կենտրոնում, մոտավորապես այնպես, ինչպես երկրի նախագահը:
ճարտարապետը լրագրողների հետ զրույցում ասաց, որ շինարարությունը դեռ չի ավարտվել, և նախագիծը վերջնական տեսք կստանա երկու-երեք տարում:
«Առաջիկայում հավելյալ տեղեր կբացվեն: Այստեղ նաև բիզնես կենտրոն կլինի, հյուրանոց, կայանտեղ: Եվ ամենագլխավորը՝ նախագծով նախատեսվում է վերաբացել «Ռոսիա» կինոթատրոնը»,- ասաց ճարտարապետ Արբակ Վարդանյանը:
Վեցհարկանի կենտրոնում խայտաբղետ գրառումներով ու ծաղիկներով զարդարված նորաձև խանութներ են, որոնց շուրջ պտտվում են հյուրերն ու լրագրողները: Բոլորին հետաքրքրում է, թե թվով երրորդ «մոլն» ինչով է տարբերվում նախորդներից:
Ութ հազար քառակուսի մետր տարածքում 65 խանութ կա, ռեստորաններ, զվարճանքի համար հատկացված հարթակներ: Շինության ընդհանուր տարածքը 12.4 հազար քմ է, որը մի քանի մասի է բաժանվում: Նախագծի արժեքը 14.8 մլրդ դրամ է կազմել:
«Այս կենտրոնն աշխատանքով կապահովի 350 մարդու: Հայաստանում բոլոր հնարավորությունները կան արդյունաբերության տարբեր ոլորտներն ու տեղական ապրանքանիշները զարգացնելու համար»,- լրագրողներին ասաց հայտնի գործարար Խաչատուր Սուքիասյանը:
Նա նշեց նաև, որ նախագիծը սկսելուց առաջ ճարտարապետական նոր համալիրի հիմնադիրները մարկետոլոգների հետ մանրամասն ուսումնասիրել են շուկան ու սպառողական ներուժը:
