ԵՐԵՎԱՆ, 4 մարտի- Sputnik, Լաուրա Սարգսյան. Երկար տարիներ ի վեր Երևանում գործող թատրոնը ո՛չ պատեր ունի, ո՛չ բեմ: Մնջախաղի պետական թատրոնը կամ, ինչպես անվանում են մասնագետները, «հայկական թատրոնների թատրոնը», մինչև այսօր շենք չունի:
Սակայն թափառաշրջիկի ճակատագիրը չի խանգարել, որ թատրոնն առաջին հորիզոնականներ զբաղեցնի Սերբիայի, Բոսնիայի և աշխարհի այլ երկրների միջազգային բեմերում:
«Մեր թատրոնի նոր խաղաշրջանը մեկնարկում է մարտի 10-ին՝ հայ գրող Դերենիկ Դեմիրճյանի «Գիրք ծաղկանց» ստեղծագործության բեմադրությամբ»,- լրագրողներին ասաց Ժիրայր Դադասյանը:
Հայկական մնջախաղի աստվածաշնչյան մոտիվը
Հայկական մնջախաղը հետաքրքիր է իր կառուցվածքով և տարբերվում է դասական, համաշխարհային կամ համընդհանուր մնջախաղից: Մնջախաղի ժանրի դերասանների շարժումների և պլաստիկայի հիմքը քառակուսին է: Մարդը կարծես իր շուրջը քառակուսի է գծում: Այդ համամասնությունները կարելի է նկատել նաև մեր ազգային ճարտարապետության մեջ:
Հայկական մնջախաղի տարրերի օգտագործման մասին առաջին հիշատակությունը եղել է 12-13-րդ դարերում: Հաղպատի ավետարանի մանրանկարներում, որոնց հիման վրա այսօր կարելի է դիտել «Շերանիկ» ներկայացումը, հայկական մնջախաղի տարրեր կան:
«Մանրանկարիչն այդ շրջանի քաղաքի բնակիչներին պատկերել է աստվածաշնչյան կերպարների միջոցով: Օրինակ` Հիսուսն այստեղ պատկերված է ծուռ քթով: Մենք ենթադրում ենք, որ Քրիստոսի կերպարի տակ Անիի որևէ պատվավոր քաղաքացի է թաքնված»,- Sputnik Արմենիայի թղթակցին ասաց Ժիրայր Դադասյանը:
Նախնադարյան մարդկանց հաղորդակցության հիմքում հենց մնջախաղն է ընկած: Մնջախաղի առաջին տարրերի մասին հիշատակվում է Արիստոտելի աշխատություններում և Քրիստոսի ծննդից առաջ տարբեր դարաշրջանների հեղինակների մոտ:
Ենգիբարյանի փառատոնը
Հայաստանը շարունակում է մնջախաղի ավանդույթները, որոնք գալիս են դարերի խորքից: Դրա օրինակն է Լեոնիդ Ենգիբարյանի անվան միջազգային փառատոնը: Հայաստանի կառավարության որոշման համաձայն` փառատոնն այսուհետև կանցկացվի ամեն տարի:
Փառատոնը, որի ներկայացումներն անցկացվում են բաց երկնքի տակ, կանցկացվի Ծաղկաձորում օգոստոսի 10-15-ը: Ավանդույթի համաձայն` աշխարհի տարբեր երկրներից Հայաստան կժամանեն համաշխարհային մնջախաղի ներկայացուցիչները:
«Եթե մենք հնարավորություն ունենայինք, մենք քաղաքի սիրտը կզարդարեինք կենդանի քանդակներով»,- ասաց Դադասյանը:
