ԵՐԵՎԱՆ, 3 մարտի — Sputnik. ԱՄՆ-ի քաղաքացիների շրջանում այնպիսի կարծրատիպ է ձևավորվել, որ ԱՄՆ-ն ԻՊ-ի դեմ պայքարում գերիշխող դեր է ստանձնել, Sputnik Արմենիա պորտալին ասաց Միջազգային ու անվտանգության հարցերի հայկական ինստիտուտի ղեկավար Ստեփան Սաֆարյանը։
Sputnik.Կարծիք հարցախույզի տվյալներով` ամերիկացիների 80 տոկոսը կարծում է, որ ԱՄՆ-ն Սիրիայում «Իսլամական պետության» դեմ պայքարի հիմնական ուժն է։ Եվրոպայի դերն ընդունող մարդկանց թիվը համեմատաբար փոքր է` 8% Գերմանիայի համար, 25%, 29% և 36%` համապատասխանաբար Ռուսաստանի, Մեծ Բրիտանիայի և Ֆրանսիայի համար։
«ԱՄՆ-ն միջազգային ահաբեկչության դեմ պայքարը սկսել է բավականին շուտ, հասարակության մեջ դա կարծրատիպ է դարձել։ Հասարակությունը, որը սեպտեմբերի 11, աֆղանական պատերազմ, Իրաք է տեսել, պատրաստ է ընդունել, որ ԱՄՆ-ն նույն կերպ պայքար է մղում Իսլամական պետության դեմ։ Սրա հետ կապված հակառակ որևէ տեղեկատվություն քիչ արժանահավատ է լինելու, քան այն, ինչ ներկայացնում են ԱՄՆ-ի լրատվամիջոցները», — նշեց Սաֆարյանը։
Նրա խոսքով` հարցը բազմակողմանի տեղեկատվության բացակայությունը չէ։ Տեղեկատվության աղբյուրները բազմաթիվ են, մարդիկ կարող են այլընտրանք գտնել։ ԱՄՆ-ում կան նաև տեղեկատվության ռուսական աղբյուրներ, օրինակ` RT-ն։
Մյուս կողմից` առավել հետաքրքիր իրավիճակ է ստեղծվել եվրոպական երկրներում։
«Տվյալները ցույց են տալիս, որ այդ երկրների բնակիչներն ԻՊ-ի դեմ պայքարի վերաբերյալ ավելի շատ ու տարբեր աղբյուրներից են տեղեկություն ստանում», — ասաց Սաֆարյանը` մեկնաբանելով հարցման արդյունքները։
Եվրոպայում պատկերն այլ է։ Բացի այն, որ այդ երկրների քաղաքացիները տեղեկացված են ԻՊ-ի դեմ պայքարում իրենց երկրների մասնակցության մասին, նրանք սեփական դիրքորոշում ունեն` կապված նրա հետ, թե Սիրիայում ով ում դեմ է պայքարում։
Նա համոզված է, որ եթե նման հարցում Ռուսաստանում անցկացվի, ապա ԱՄՆ-ի հակառակ պատկերը կստանանք։ Ռուսաստանում հավանաբար բոլորը համոզված կլինեն, որ ԻՊ-ի դեմ պայքարում է միայն Ռուսաստանը, իսկ ԱՄՆ-ն ԻՊ-ն ստեղծողներից մեկն է։
