Մարտն ավանդաբար կանանց ամիս է համարվում։ Մարտի 3-ին Ճապոնիայում նշվում է աղջիկների տոնը, որը քնքշորեն անվանում են Հինա մացուրի (Hina Matsuri –Հինա տիկնիկների տոն) կամ Մոմո-նո սեկու (Momo-no Sekku – դեղձենու ծաղման տոն)։
Այդ օրն այն ընտանիքները, որտեղ աղջիկներ կան, հատուկ դարակների վրա հատուկ տիկնիկներ` հինա նինգյոներ են ցուցադրում։
Այդ օրը աղջիկները ծաղկանախշ կիմոնոներ են հագնում ու նմանվում տիկնիկների։ Նրանք հյուր են գնում, միմյանց նվերներ մատուցում, քաղցրավենիք ուտում և թույլ ալկոհոլային սակե խմում։
Տոնի ժամանակ աղջիկները պետք է հետևեն բարեկրթության կանոններին։ Հինա մացուրիի նպատակը աղջիկների դաստիարակությունն է, այդ օրը նրանց ծնողները ցույց են տալիս, որ իրենց աղջիկները լավ դաստիարակություն են ստացել և տիրապետում են վարվեցողության կանոններին։
