ԵՐԵՎԱՆ, 3 մարտի — Sputnik. Ազգ, որն ունեցել է Տիգրան Մեծ և Արտաշես 1-ին և այդքան զորավարներ, ազգ, որն ունեցել է ծովից ծով Հայաստան, չէր կարող չունենալ մարտարվեստներ։ Բայց իրականում տարբեր պատճառներով ոչինչ չի պահպանվել, ասում է Գևորգյան Մարտարվեստի դպրոցի հիմնադիր Գևորգ Գևորգյանը։
«Մարտարվեստ ասելով` պատկերացնում ենք հոլիվուդյան ֆիլմերի հիմքի վրա տեխնիկական ունակություններ, այնինչ մարտարվեստը ֆիզիկական մարմնակրթության միջոցով մտքի և հոգու եռաչափ դաստիարակության համակարգ է»,- վստահեցնում է Գևորգյանը։
Ըստ նրա` բոլոր ազգերն ունեցել են մարտարվեստներ, դա մարդու աշխարհընկալումն է։
Հայկական մարտարվեստը հիմնված է մեսրոպյան տառերի, հնչյունաբանության և խաչի վրա։ Մարտարվեստը գիտություն է, ամբողջական համակարգ, որտեղ մարդիկ տարբեր վարժությունների, մարմնակրթության միջոցով հասնում են մտքի ճկունության, առողջության, դպրոց է, որը պարտադիր է յուրաքանչյուր մարդու համար` անկախ սեռից և տարիքից։
«Հայկական մարտարվեստն ունի մեծ համակարգ, որը գոնե 6 ամսից 1 տարի պարտադիր է յուրաքանչյուրի համար։ Սա գիտություն է, որը մեր աշխարհընկալման, մտածելակերպի, մեր տեսակի մեջ է, որը լուրջ հաջողությունների է հասցնում յուրաքանչյուրին իր ոլորտում` անկախ մասնագիտությունից»,- նշում է Գևորգյանը։
Հայկական մարտարվեստի դպրոցի հիմնադիրը կյանքը երբեք չի տեսել գորշ և մռայլ գույներով, սիրում է կյանքը, փորձում է իր գործունեությամբ դրդել մարդկանց սիրել կյանքը։ Վստահեցնում է, որ երբ սկսում ես սիրել, սկսում ես ստեղծագործել ու ապրել։
Գևորգ Գևորգյանի հետ զրույցի ամբողջական տարբերակը կարող եք ունկնդրել Sputnik Արմենիա ռադիոկայանի եթերում, «Կաղապարից դուրս» հաղորդաշարի մայիսյան շարքի շրջանակում։
