ԵՐԵՎԱՆ, 3 մարտի —Sputnik. Նոր ընտրական օրինագծի հենքը նոր Սահմանադրությունն է, որի ընդունումից հետո սահմանվեցին ժամկետներ, որոնց ընթացքում պետք է օրենքի նախագծեր մշակվեին,- ասաց կառավարության աշխատակազմի ղեկավար-նախարար Դավիթ Հարությունյանը։
«Դրա համար ժամկետը մինչև մարտի մեկն էր սահմանվել: Փաթեթը մշակելու համար ունեինք տասներեք օր, սակայն քանի որ այս ընթացքում չունեինք ԱԺ հերթական նիստ, իսկ արտահերթը նպատակահարմար չէր, նախագիծը ներկայացվում է հիմա: Եկանք այն եզրակացության, որ հիմնական քննարկումների բեռը պետք է տեղափոխվի քաղաքական դաշտ՝ ԱԺ, որտեղ քաղաքական ամբողջ ներկապնակն է ներկայացված: Եթե այս նախագիծը հիմա հավանության արժանացնենք, ապա այդպիսով կազդարարենք հանրային քննարկումների մեկնարկը ԱԺ-ում»,- ասաց Դավիթ Հարությունյանը։
Նա մանրամասն ներկայացրեց Ընտրական օրենսգրքում կատարված փոփոխությունները։
Ըստ նախագծի` առաջարկվում է, որ ՏԻՄ ընտրությունները Գյումրիում և Վանաձորում, ինչպես Երևանում, լինեն անուղղակի, այսինքն` համամասնական ձևով։ ԱԺ-ն նույնպես ձևավորվելու է համամասնական ընտրությունների արդյունքում։ Արմատապես փոխվելու է նաև ԿԸՀ-ի ձևավորման կարգը, պատգամավորների ձայների 3/5-ով պետք է ընտրվի կազմը, այսինքն` ԿԸՀ-ն ձևավորվելու է ԱԺ-ի կողմից։ ԿԸՀ-ի նախագահը չի կարող ընտրվել երկու անգամից ավելի։ Ըստ Դավիթ Հարությունյանի` այդ կարգը արհեստավարժություն ու ներգրավվածություն է ապահովելու։
Պատգամավորների 50 տոկոսն ընտրվելու է տարածքներից, մյուս 50 տոկոսը ներկայացնելու է համապետական ծրագիր։ Այս ընտրական մոդելը ուժեղ կուսակցական ներկայություն է ձևավորելու։ Եթե որևէ քաղաքական ուժ ստացել է 50+ 1 ձայն, նշանակում է` ԱԺ-ն ձևավորված է։
«Եթե որևէ կուսակցություն չի ստացել 50+1 ձայն, ապա քաղաքական ուժերը կարող են կոալիցիա ձևավորել։ Ոչ ավելի, քան երեք ուժ։ Եթե այդ կոալիցիան ունենում է 50+1 տոկոս, դառնում է կայուն խորհրդարանական մեծամասնություն։ Եթե կոալիցիա չի ձևավորվում, հնարավորություն է լինելում ձևավորել նոր դաշինքներ ։ Խորհրդարանում 4 մանդատ է հատկացվելու ազգային փոքրամասնություններին»,- հայտնեց Հարությունյանը։
Նոր ընտրական օրենսգրքով` անձը ստանում է էլեկտրոնային քվեարկության հնարավորություն` ներկայացնելով անձը հաստատող փաստաթուղթ։ Սարքը տրամադրում է հատուկ կտրոն, որից հետո կանաչ կամ կարմիր լույս է վառվում։ Եթե լույսը կանաչ է, ուրեմն ամեն ինչ նորմալ է, եթե կարմիր` նշանակում է` կրկնակի քվեարկության դեպք է գրանցվել։
Դավիթ Հարությունյանը նշեց, որ Ընտրական նոր օրենսգրքի այս նախագիծը տարբերվում է Վենետիկի հանձնաժողով ուղարկված նախագծից, և այն պետք է ընդունված լինի մինչև հունիսի 1-ը։
