ԵՐԵՎԱՆ, 2 մարտի-Sputnik. Գոհար Սարգսյան. Շքեղ թռիչքներ ու հզոր պտույտներ սառցե թագավորությունում։ Հայ փոքրիկ գեղասահորդները, աչքերը լայն բացած ու հիացական արտահայտություններով, հետևում էին կանադացի Էլաջ Բալդեի հնարքներին։ Նա էլ անհոգ դեմքով, եթերային ցատկերով պտտվում էր երեխաների շուրջն ու սովորեցնում սառույցի «լեզուն»։ Էլաջ Բալդեի` իրար հակասող մաշկի գույնն ու ռուսերեն խոսքը ստիպեցին հարցնել նրա արմատների մասին։
«Մայրս ռուս է, իսկ հայրս` աֆրիկացի։ Ծնվել եմ Մոսկվայում, իսկ հետո բնակություն հաստատել Կանադայում, ավելի կոնկրետ` Մոնրեալում։ Արմատներս են պատճառը, որ խոսում եմ ռուսերեն, չնայած փոքրիկ թերություններով»,-համեստ ժպիտով պատմեց Բալդեն։
Հայտնի գեղասահորդն առաջին անգամ սառույցի վրա է հայտնվել 7 տարեկանում։ Սկզբում չի սիրել գեղասահքը, պարբերաբար թաքցրել է չմուշկները մարզումներից խուսափելու համար։ Այսօր մայրիկին է պարտական, որ շարունակել է զբաղվել այս մարզաձևով ու լուրջ հաջողություններ գրանցել։ Իր հայազգի ընկերոջ շնորհիվ Բալդեն կիլոմետրեր է կտրել ու հայտնվել Հայաստանում։ Խոստովանում է` առաջին անգամն է ու վստահեցնում, որ ոչ վերջին։
«Ընտիր սառույց է ու լավ սահադաշտ։ Ես խոսեցի ձեր փոքրիկ մարզիկների հետ ու պարզեցի, որ նրանցից շատերն ընդամենը մի քանի ամիս է, ինչ մարզվում են։ Սակայն նրանք լավ են սահում, ուրեմն տաղանդավոր են»,-ասաց մարզիկը։
Բալդեին Հայաստան է ուղեկցել ընկերը` պրոդյուսեր Արի Զաքարյանը։
«Բալդեն Կանադայի հավաքականի անդամ է, յուրահատուկ մարզիկ, որն ակրոբատիկ թռիչքներ է կատարում։ Այսօր ամենաշատ` 3 անգամ սալտո թռչողը նա է։ Հայաստանում կփորձի նոր ռեկորդ սահմանել` ավելի շատ անել»,-ասաց Արի Զաքարյանը։
Զաքարյանը նաև Եվգենի Պլուշչենկոյի մենեջերն է, ու նրա անմիջական ջանքերի շնորհիվ է Հայաստանում կազմակերպվելու «Սառույցի թագավորները» սառցե շոուն։ Դա աննախադեպ շոու է Հայաստանում` Օլիմպիական չեմպիոնների, աշխարհի և Եվրոպայի առաջնությունների մրցանակակիրների մասնակցությամբ։ Հանդիսատեսը հնարավորություն կունենա հետևելու սառցե ակրոբատների խելահեղ և ապշեցուցիչ ցատկերին, սառցե բեմի վերևում կատարվող ֆանտաստիկ թռիչքներին, ձեռնածուի տպավորիչ հնարքներին ու սառույցի վրա իսկական կրակի հետ տեղի ունեցող պայքարին։ Հանճարեղ մարզիկների կողքին միևնույն սառույցի վրա կհայտնվեն նաև հայազգի Անաստասիա Գալուստյանն ու Սլավիկ Հայրապետյանը։
