ԵՐԵՎԱՆ, 2 մարտի- Sputnik. Հայաստանի Հանրապետությունում տեղակայված ռուսական ռազմակայանի «Կամխուդ» բարձլեռնային զորավարժարանում հետախուզական ստորաբաժանումների հատուկ մարտավարական զորավարժություններում ներառվել են ավելի քան 300 զինծառայող և շուրջ 50 միավոր տեխնիկա։
Զորավարժությունների ընթացքում զինծառայողները մշակում են կապի, կրակային, մարտավարական, հատուկ, ինժեներական նախապատրաստման, տեղագրության և մարտական մեքենաներ վարելու հետ կապված առաջադրանքները` ձմեռային էքստրեմալ պայմաններում, ծովի մակարդակից ավելի քան 1,5 հազար մետր բարձրության վրա։
«Պայմանական հակառակորդի դիվերսիոն խմբերի վրա հարձակվելու և դարանակալելու հարցերի մշակման ժամանակ հետախույզները հրաձգային զենքով և մարտական մեքենաներով ստուգիչ նշանաձգության վարժություններ կկատարեն։ Ստորաբաժանումների գործողությունները վերահսկելու համար ներգրավել են հետախուզության ժամանակակից համալիրների «Նավոդչիկ 2» և «Օրլան 10» անօդաչու թռչող ապարատները»,- նշված է հաղորդագրությունում։
Հետախույզները կյուրացնեն նաև ձեռնամարտի և դանակով մարտերի հիմունքները, կսովորեն արագ գնդակային հրաձգություն վարել և նռնակներ նետել լեռնային տեղանքում ու հարթավայրերում։ Հատուկ մարտավարական նախապատրաստության փորձառու տեսուչները զինծառայողներին կսովորեցնեն` ինչպես է պետք հաղթահարել արգելքների հոգեբանական գոտին և հետախույզի ուղին։
Դաշտային զորավարժությունները կավարտվեն մարտական և հատուկ նախապատրաստության թեմաների վերաբերյալ ստուգարքներով։
