ԵՐԵՎԱՆ, 2 մարտի — Sputnik. «Հիդրոմետ» ծառայության Օդերևութաբանության կենտրոնի պետ Զարուհի Պետրոսյանը ներկայացրեց մարտ ամսվա կանխատեսումները և նշեց, որ տաք հագուստներն ու անձրևանոցները, համենայն դեպս, պետք է դեռ ձեռքի տակ պահել։
«Անձրևանոցների սեզոնը նոր է սկսվում։ Մարտի 5-ին և 6-ին հանրապետությունում, այդ թվում նաև մայրաքաղաքում անձրև է սպասվում»,- ասաց Զարուհի Պետրոսյանը։
Նա մեկնաբանեց նաև լուրերն այն մասին, որ այս տարվա մարտ ամիսը հարյուրամյակի ամենատաք մարտն է լինելու։
«Հիդրոմետ ծառայությունը նման կանխատեսում չի արել։ Պարզապես կանխատեսել է, որ միջին ամսական ջերմաստիճանը նորմայից բարձր կլինի 1-2 աստիճանով, ինչը չի նշանակում «հարյուրամյակի ամենատաք մարտ»»,- ասաց կենտրոնի պետը։
Ըստ նրա` առաջիկայում բավականին բարձր ջերմաստիճան է սպասվում հանրապետությունում, հատկապես` ցածրադիր գոտիներում` Արարատյան դաշտում, Սյունիքում, Տավուշում։ Արարատյան դաշտում օդի ջերմաստիճանը կարող է հասնել մինչև 20-23 աստիճանի, Սյունիքի և Տավուշի հովիտներում ` 20-25 աստիճանի։
Զարուհի Պետրոսյանի խոսքով` հովտային շրջաններում սովորական ժամկետներից շատ ավելի վաղ արդեն սկսվել է վեգետացիան, և այժմ լուրջ խնդիրներ են ծառացել գարնանային աշխատանքների, դրանց արագացման և ժամանակին հասցնելու հետ կապված։
«Մարտը տաք է լինելու, բայց դեռ բոլորվին չի բացառվում ցրտահարությունների վտանգը, թեև նման կանխատեսումներ չկան։ Ապրիլի կանխատեսում դեռ չկա, չի էլ կանխատեսվում, որ ցրտահարություն կլինի։ Այդպիսի կանխատեսումներ անել հնարավոր չէ։ Առաջիկա 10 օրերին, համենայն դեպս նմանատիպ երևույթներ չեն սպասվում»,- ասաց Պետրոսյանը։
Անցած տարի վեգետացիան կրկին վաղ շրջանում էր սկսվել, բարեբախտաբար ո՛չ մարտին, ո՛չ ապրիլին ցրտահարություն չդիտվեց, համենայն դեպս` Արարատյան դաշտում։
Օդերևութաբանության կենտրոնի պետը հույս հայտնեց, որ այս տարին էլ այդ իմաստով բացառություն չի լինի, և վաղ գարունը չի խանգարի բարեհաջող գյուղատնտեսական տարի ունենալ։
