ԵՐԵՎԱՆ, 2 մարտի — Sputnik. Ռոսսելխոզնադզորը մտահոգված է Հայաստանից, Ադրբեջանից, ինչպես նաև Եգիպտոսից դեպի Ռուսաստան լոլիկի ներկրման ծավալների աճով, ասվում է ռուսական գերատեսչության հաղորդագրության մեջ։
Այսպես, հունվարից փետրվար Հայաստանից ներկրված լոլիկի ծավալներն աճել են մինչև 1 հազար տոննա, Եգիպտոսից` 2 հազար տոննա և Ադրբեջանից` 3.5 հազար տոննա։
Ընդ որում` 2015 թվականի նույն ժամանակահատվածի համեմատ Եգիպտոսից ու Ադրբեջանից քիչ քանակի ապրանք էր ներկրվում, իսկ Հայաստանից ընդհանարապես չէր ներկրվում։
Ստեղծված իրավիճակի հետ կապված` Ռոսսելխոզնադզորը մտադիր է մոտ ժամանակներս հեռախոսազրույց ունենալ այդ երկրների կարանտինի ու բույսերի պահպանման հարցերով զբաղվող ազգային կազմակերպությունների լիազոր անձանց հետ։
Ռուսաստանը 2016 թվականի հունվարի 1-ից արգելել է Թուրքիայից մի շարք ապրանքի ներմուծումը, այդ թվում են մսեղենը, հավը և հնդկահավը, թարմ և սառեցված լոլիկը, սոխը, ծաղկակաղամբը և բրոկոլին, վարունգը, թարմ և չորացրած մանդարինն ու նարինջը, խաղողը, խնձորը, տանձը, ծիրանը և այլ մրգեր։ Մինչ այդ Թուրքիան առաջատար դիրք էր զբաղեցնում դեպի ՌԴ լոլիկի մատակարարման առումով։ ՌԴ կառավարությունն ավելի վաղ երեքշաբթի նշել էր, որ բոլոր տեսակի պտուղն ու բանջարեղենը, որն արգելված է ներկրել Թուրքիայից, լրացվում են այլ երկրներից ներկրմամբ։ Ռուսաստանի և Թուրքիայի հարաբերությունները ճգնաժամ են ապրում այն բանից հետո, երբ Սիրիայում Սու-24 ռմբարկուն խոցվեց թուրքական F-16-ի կողմից։
