ԵՐԵՎԱՆ, 1 մարտի — Sputnik. ԵՄ-ն կարող է Սիրիայի փախստականների խնդրի հետ կապված` Հայաստանին օգնություն հատկացնել, Երևանում տեղի ունեցած մամուլի ասուլիսի ժամանակ ասաց ԵՀ փոխնախագահ Ֆեդերիկա Մոգերինին։
«ԵՄ-ն քննարկում է Հայաստանին ճգնաժամի հաղթահարման համար ստեղծված եվրոպական վստահության հիմնադրամների օգնությամբ սիրիացի փախստականների խնդրում օգնություն տրամադրելու հարցը», — նշեց Մոգերինին։
Հայաստանի ԱԳՆ ղեկավար Էդվարդ Նալբանդյանն իր հերթին ընդգծեց, որ Հայաստանը Սիրիայից փախստականների քանակով Եվրոպայի երրորդ երկիրն է։
«Մենք գնահատում ենք այս հարցում ԵՄ-ի աջակցությունը», — ասաց Նալբանդյանը։ Նալբանդյանն անդրադարձավ նաև վիզաների պարզեցման հարցին։ Նա նշեց, որ Հայաստան և ԵՄ երկկողմ հարաբերություններում բացառիկ դեր է խաղում մարդկային շփումը։
«Տեղաշարժի ազատությունը մեր կողմից դիտարկվում է որպես երկու հասարակությունների մերձեցման կարևոր գործոն։ Արդեն երկու տարի գործում է վիզաների պարզեցման ռեժիմի և ռեադմիսիայի համաձայնագիրը։ Մենք համոզված ենք, որ ժամանակն է առաջ շարժվել ու սկսել վիզային ռեժիմի ազատականացման գործընթացը», — ընդգծեց նախարարը։
