ԵՐԵՎԱՆ, 1 մարտի — Sputnik. Աշխարհի չեմպիոնի կոչման համար մղվող մրցապայքարը կանցկացվի Նյու Յորքում 2016 թվականի նոյեմբերի 10-ից 30-ը։ Այս մասին Twitter-ի միկրոբլոգում գրել է ՖԻԴԵ-ի ղեկավար Կիրսեն Իլյումժինովը
Աշխարհի չեմպիոն Մագնուս Կարլսենը 12 խաղ կանցկացնի հավակնորդների մրցաշարի հաղթողների հետ։
Չեմպիոնական մրցաշարի մրցանակային ֆոնդն ավելի քան 1 միլիոն դոլար կկազմի։ Կազմակերպիչներն ակնկալում են, որ առցանց հեռարձակման և ԶԼՄ-ների օգնությամբ մրցապայքարին կհետևի շուրջ 1 միլիարդ մարդ։
«Ես, ինչպես Նյու Յորքի բոլոր բնակիչները, ուրախ եմ, որ Շախմատի աշխարհի առաջնությունը Նյու Յորք է վերադառնում։ Ավելի լավ տեղ չկա, քան այն քաղաքը, որի այգիների բոլոր անկյուններում շախմատ են խաղում»,- Worldchess-ը ներկայացնում է Նյու Յորքի քաղաքապետ Բիլ դե Բլազիոյի խոսքը։
Ինչ վերաբերում է Մոսկվայում անցկացվող հավակնորդների մրցաշարին, ապա այն 8 մասնակից կունենա` Վեսելին Տոպալովը (բուլղարիա), Անիշ Գիրին (Նիդեռլանդներ), Վիշվանաթան Անանդը (Հնդկաստան), Հիկարու Նակամուրան և Ֆաբիանո Կարուանան (ԱՄՆ), Սերգեյ Կարյակինն ու Պյոտր Սվիդլերը (Ռուսաստան), Լևոն Արոնյանը (Հայաստան)։
Այս մրցաշարի մրցանակային ֆոնդը շուրջ 420 հազար եվրո է կազմում։
