ԵՐԵՎԱՆ, 1 մարտի- Sputnik. Հայ փրկարարները Քաղաքացիական պաշտպանության միջազգային օրվա առթիվ հատուկ մարտավարական ուսումնավարժություններ անցկացրին։
«Մարտի 1-ին նշվում է Քաղաքացիական պաշտպանության միջազգային օրը։ 1994թ.-ից Հայաստանը նույնպես Քաղաքացիական պաշտպանության միջազգային կազմակերպության անդամ է դարձել։ Այս օրը մեզ համար տոն է, և Հայաստանի արտակարգ իրավիճակների նախարար Արմեն Երիցյանի ու քաղաքապետ Տարոն Մարգարյանի հրահանգով Երևանի 180 դպրոցում քաղաքացիական պաշտպանության թեմայով դասեր են կազմակերպվում»,- լրագրողներին ասաց Հայաստանի ԱԻՆ փրկարարական ծառայության տնօրենի տեղակալ, Երևանի փրկարարական վարչության պետ, գնդապետ Մուշեղ Ղազարյանը։
Փրկարարներն ու շտապօգնության բժիշկները «հրդեհի» վայր ժամանեցին ահազանգը ստանալուց 10 րոպե անց և սկսեցին համապատասխան գործողություններ իրականացնել, քանի որ «հակառակորդն օդային հարձակում էր ձեռնարկել»։
Ժամանեց Երևանի փրկարարական վարչության Ավան բաժնի թիվ 11 հատուկ փրկարարական ջոկատի անձնակազմը և տեխնիկան` «Հակառակորդի օդուժի հարձակման դեպքում աշակերտների և աշխատակիցների պաշտպանության իրականացումը» տակտիկական ուսումնավարժությունների շրջանակում փրկարարական աշխատանքներ անցկացնելու համար։
Աշակերտներն ու ուսուցիչները դուրս եկան դպրոցի շենքից, մի քանի շարք կազմեցին և սկսեցին սպասել փրկարարներին։
Այդ ընթացքում բժիշկները «դուրս բերեցին տուժած» աշակերտներին, որոնք սցենարի համաձայն` տարբեր աստիճանի վնասվածքներ էին ստացել։ Նրանց անմիջապես բժշկական օգնություն ցուցաբերվեց։
Հրշեջ-փրկարարներին հաջողվեց հաշված րոպեների ընթացքում հանգցնել կրակը` հաշվի առնելով այն, որ «կրակը գնդակոծության հետևանքով բռնկվել էր» մի քանի տեղում, ինչպես դպրոցի ներսում, այնպես էլ` բակում։
«Մաղթում եմ, որ մեր ժողովուրդը արտակարգ իրավիճակներ չտեսնի, բայց միաժամանակ մենք պետք է միշտ լիակատար պատրաստվածության մեջ լինենք»,- ասաց Ղազարյանը։
Նրա խոսքով` փրկարարների բոլոր գործողությունները նա «բավարար» է գնահատում է, քանի որ կատարելության հասնելու համար պետք է շատ ջանքեր գործադրել։
«Մենք պարտավոր ենք բոլորին սովորեցնել, թե ինչ է Քաղաքացիական պաշտպանության օրը։ Այս օրը բոլորի համար է, և բոլոր քաղաքացիները պետք է իմանան, թե ինչ է աղետը։ Այդ առումով շատ կարևոր է նման ուսումնավարժությունների անցկացումը և թեմատիկ դասերի կազմակերպումը»,- բացատրեց Ղազարյանը։
Քաղաքացիական պաշտպանության միջազգային օրը (World Civil Defence Day) ամեն տարի նշվում է մարտի 1-ին։ Այն հռչակվել է 1990թ.-ին Քաղաքացիական պաշտպանության միջազգային կազմակերպության գլխավոր վեհաժողովի 9-րդ նիստի որոշումով։
Տոնի օր է սահմանվել Քաղաքացիական պաշտպանության միջազգային կազմակերպության կանոնադրության` ուժի մեջ մտնելու օրը (1972թ. մարտի 1), որի ընդունումից հետո ՔՊՄԿ-ն ստացել է միջկառավարական կազմակերպության կարգավիճակ։
