ԵՐԵՎԱՆ, 1 մարտի — Sputnik. Հայաստանի հրաձգության հավաքականի մարզիչը դժգոհ է այս արդյունքից:
«Մեզ հաջողվեց մեկ արծաթե և երկու թիմային բրոնզե մեդալ նվաճել Եվրոպայի այս առաջնությունում: Իհարկե, ես շատ դժգոհ եմ: Ես իսկապես հոգեբանորեն շատ վատ վիճակում եմ: Մեր առաջին խնդիրն այն էր, որ մենք օրեր առաջ տարել էինք զենքերը մաքսային տարածք, արկղերը փակվել էին և գնալուց հետո մոտ 6 օր չենք մարզվել: Արդյունքում ստացանք այն, ինչ ստացանք: Ես չեմ արդարանում, բայց ես գիտեմ մեր մարզիկների պատրաստվածությունը. նրանք պատրաստ էին»,- ՀԱՕԿ-ի մամուլի ծառայության հետ զրույցում ասել է հավաքականի գլխավոր մարզիչ Սեյրան Նիկողոսյանը:
Խոսելով պատանեկան Օլիմպիական խաղերի արծաթե մեդալակիր Հրաչիկ Բաբայանի մասին՝ գլխավոր մարզիչ Նիկողոսյանը փաստեց, որ Բաբայանը Եվրոպայի առաջնության բացման արարողության ժամանակ ոտքը պատահմամբ վնասել է:
«Ցավոք սրտի, սա մեր վերջին օլիմպիական վարկանիշ տվող մրցաշարն էր: Առաջիկա մրցաշարերից կմասնակցենք աշխարհի գավաթի խաղարկությանը Մյունխենում, և ունենք վազող թիրախ վարժություններից աշխարհի առաջնություն»,-ասաց մարզիչը:
Հունգարիայի Գիոր քաղաքում փետրվարի 22-28-ը տեղի ունեցավ Եվրոպայի առաջնություն 10մ հեռավորությունից՝ հրացան, ատրճանակ, վազող թիրախ զենքաձևերից, որին մասնակցում էր 47 երկրի 588 մարզիկ: Եվրոպայի առաջնությանը Հայաստանը մասնակցեց 14 մարզիկով, իսկ հավաքականը գլխավորում էին գլխավոր մարզիչ Սեյրան Նիկողոսյանը և ավագ մարզիչ Անդրանիկ Այվազյանը:
