ԵՐԵՎԱՆ, 29 փետրվարի — Sputnik. Վերահսկիչ պալատի նախագահի տեղակալ Լևոն Յոլյանը Էներգետիկայի և բնական պաշարների նախարար է նշանակվել։ Նա այս պաշտոնում կփոխարինի Երվանդ Զախարյանին։
Վաղը` մարտի 1-ին, վարչապետը նոր նախարարին կներկայացնի նախարարության աշխատակիցներին։
Լևոն Յոլյանը ծնվել է 1959 թվականի սեպտեմբերի 16-ին Երևանում: 1980թ.-ին գերազանցությամբ ավարտել է Երևանի ժողովրդական տնտեսության ինստիտուտը: 1980-1982թթ.–ին ծառայել է Խորհրդային բանակում: Ավարտել է Երևանի ժողովրդական տնտեսության ինստիտուտի ասպիրանտուրան` հեռակա ուսուցմամբ:
Աշխատել է Սովետաշենի տրիկոտաժի արտադրական միավորումում` որպես տնտեսագետ:
1982-1984թթ.-ին Հայաստանի կոմերիտմիության կենտկոմի հրահանգիչ,
1984-1986թթ.-ին կոմերիտմիության Աբովյանի շրջանային կոմիտեի առաջին քարտուղար, 1985թ. ընտրվել է Աբովյանի շրջանային խորհրդի պատգամավոր,
1986-1990թթ.-ին Հայաստանի կոմերիտմիության կենտրոնական կոմիտեի քարտուղար, 1990-1993թթ.-ին Հայաստանի Երիտասարդական միության նախագահ,
1986-1992թթ.-ին եղել է Լուսավորության նախարարության կոլեգիայի, Բարձրագույն կրթության և գիտության նախարարության կոլեգիայի անդամ,
1990-1992թթ.-ին Համամիութենական Լենինյան Կոմունիստական Երիտասարդական Միության (ՀամԼԿԵՄ) բյուրոյի անդամ,
1996-2000թթ.-ին Հայաստանի արհեստակցական միությունների խորհրդի (ՀԱՄԽ) նախագահության անդամ,
1993-1998թթ.-ին «LLG» ՓԲԸ-ի նախագահ,
1998-2000թթ. ՀՀ պետական առողջապահական գործակալության պետի տեղակալ,
2000-2007թթ.-ին ՀՀ առողջապահության նախարարի տեղակալ:
2007թ.-ի նոյեմբերին նշանակվել է ՀՀ ՎՊ նախագահի տեղակալ:
2013թ.-ի դեկտեմբերի 13-ին վերանշանակվել է ՎՊ նախագահի տեղակալի պաշտոնում:
2008թ.-ին պարգևատրվել է «Հայրենիքին մատուցած ծառայությունների համար» 2-րդ աստիճանի մեդալով:
2004թ.-ից մինչ օրս Հայաստանի շախմատի ֆեդերացիայի նախագահի տեղակալն է: Ունի շախմատի գծով միջազգային կարգի սպորտի վարպետի կոչում:
Անկուսակցական է: Ամուսնացած է, ունի երեք դուստր, չորս թոռ:
