ԵՐԵՎԱՆ, 29 փետրվարի — Sputnik, Խաչիկ Չախոյան. Անկասկած, Եվրո-2016-ի ֆավորիտների առաջատար խաղացողների մեծ մասը հանդես է գալիս Եվրոպական առաջատար առաջնություններում: Փետրվարին ՈւԵՖԱ-ի հրապարակած հավաքականների վարկանիշային ցուցակը գլխավորում է Իսպանիայի ընտրանին:
Եվրոպական երկրների առաջնությունների թոփ հնգյակը շարունակում է մնալ նույնը՝ Իսպանիա, Գերմանիա, Անգլիա, Իտալիա, Ֆրանսիա: Այս երկրների առաջնություններում թիմերին մնացել է անցկացնել 10-13 հանդիպում: Բայց արդեն ուրվագծվել են այն թիմերը, որոնք պայքարում են չեմպիոնի տիտղոսի համար: Իսկ Ֆրանսիայում արդեն կարելի է համարել, որ չեմպիոնի հարցը լուծված է:
ՊՍԺ-ն գլխավորում է մրցաշարային աղյուսակը՝ 23 միավորի առավելություն ունենալով երկրորդ տեղում ընթացող «Մոնակոյի» նկատմամբ: Ընդ որում, ՊՍԺ-ն առաջին պարտությունը առաջնությունում կրեց փետրվարի 28-ին՝ 1:2 հաշվով զիջելով «Լիոնին»:
Անհնար է պատկերացնել, որ մնացած տասը տուրում փարիզյան թիմը կկորցնի առաջատարի դիրքը: Գերմանիայի առաջնությունում «Բավարիան» նույնպես թվում է թե անսասան է առաջատարի դերում: Ճիշտ է` պետք է նշել, որ Խոսեպ Գվարդիոլայի թիմը երկրորդ տեղում ընթացող Դորտմունդի «Բորուսիայի» նկատմամբ ունի ութ միավորի առավելություն, և, բնականաբար, դեռ վաղ է խոսել չեմպիոնական տիտղոսի մասին:
Սակայն «Բավարիան» իր խաղով ու արդյունքներով մեկ անգամ չէ, որ ապացուցել է իր բարձր կարգը, և թիմը իրոք չեմպիոնական մրցավազքի առաջին հավակնորդն է:
Իսկ ահա մյուս երեք առաջնությունում իրավիճակն ավելի խճճված է:
Արքայական «Ռեալի» գլխավոր մարզիչ Զինեդին Զիդանը «Ատլետիկոյից» կրած պարտությունից հետո հայտարարեց, որ «Ռեալը» չեմպիոնական պայքարից դուրս մնաց: Թիմը առաջնության ավարտից 12 տուր առաջ նույնքան միավորով զիջում է աղյուսակը գլխավորող «Բարսելոնային»: Բայց կատալոնացիների ու մադրիդցիների մեջտեղում ընթանում է «Ատլետիկոն», որը իր հերթին ութ միավոր պակաս ունի Լուիս Էնրիկեյի թիմից: Ընդ որում, առջևում է դեռևս սուպերկլասիկոն: Պարզ է, որ «Բարսելոնան» առաջատարն է աղյուսակում, ու, անկասկած, չեմպիոնական մրցավազքում լրիվ թափով ընթացող կատալոնյան թիմին կանգնեցնելն անհավանական է թվում: Բայց այստեղ էլ դեռ չեմպիոնի անունը փաստելու համար մի փոքր ժամանակ է հարկավոր:
Իտալական «Ա» սերիայում «Յուվենտուսն» իր կայուն ու արդյունավետ խաղի շնորհիվ կարողացավ շրջանցել «Նապոլիին» ու հիմա հաստատուն քայլերով, խաղից-խաղ ամրապնդում է առաջատարի դիրքը: 27-րդ տուրում էլ «Ինտերի» նկատմամբ հաղթանակը ապացուցեց, որ թուրինցիների մրցակիցներին շատ դժվարին պայքար է սպասվում սկուդետոյի համար: Մյուս կողմից էլ «Ծեր սինյորան» նույնպես պետք է տքնի, որպեսզի թիմը կարողանա 32-րդ անգամ նվաճել Իտալիայի չեմպիոնի կոչումը:
Ամենախճճված իրավիճակը թերևս Անգլիայի առաջնությունում է: 2014/15 թվականների առաջնությունում համեստ «Լեսթերը» եզրափակում էր աղյուսակը համեստ արդյունքով(18 միավոր): Պրեմիեր լիգայի ընթացիկ առաջնությունում «Լեսթերն» առաջատարն է 56 միավորով ու հավակնում է չեմպիոնական մեդալների:
Կլաուդիո Ռանյերիի թիմն, անկասկած, մրցաշրջանի բացահայտումն է ու, ընդ որում, ոչ միայն Անգլիայում, այլ` ամբողջ Եվրոպայում: Բայց «Լեսթերը» շատ լուրջ մրցակիցներ ունի ի դեմս «Արսենալի», «Տոտենհեմի» ու«Մանչեսթեր Սիթիի»:
Այս չորս թիմերը համարյա հավասար հնարավորություններ ունեն չեմպիոնական տիտղոսը նվաճելու համար, բայց բոլորից ներկա դրությամբ իր խաղով առանձնանում է Լոնդոնի «Տոտենհեմը»: Անգլիայի առաջնություններում «Տոտենհեմը» չեմպիոն է դարձել երկու անգամ՝ 1951 և 1961 թվականներին: Հիմա Մոուրիսիո Պոչետինոյի թիմը շատ հավանական է, որ 55 տարի ընդմիջումից հետո նորից հասնի բաղձալի արդյունքին:
Մեր վարկածով` թոփ առաջնություններում չեմպիոնի կոչումը կնվաճեն «Բարսելոնան» (Իսպանիա), «Բավարիան» (Գերմանիա), «Տոտենհեմը» (Անգլիա), «Յուվենտուսը» (Իտալիա) և ՊՍԺ-ն (Ֆրանսիա)։
