ԵՐԵՎԱՆ, 29 փետրվարի — Sputnik. Մոսկվայում ձերբակալել են մի կնոջ, որին կասկածում են երեխայի դաժան սպանության մեջ, երկուշաբթի լրագրողների հետ զրույցում ասել է ՌԴ ՔԿ Մոսկվայի վարչության ղեկավարի ավագ օգնական Յուլյա Իվանովան։
«Հաշվի առնելով ձերբակալվածի ոչ ադեկվատ պահվածքը` քննիչները դատաբժշկական փորձաքննությունն են նշանակել ստուգելու համար, թե որքանով է նա գիտակցում սեփական գործողությունների նշանակությունը»,- ասել է Իվանովան։
Քննության վարկածով` այսօր առավոտյան Մոսկվայի բնակելի շենքերից մեկում բռնկված կրակը մարելուց հետո մոտավորապես 3-4 տարեկան երեխայի դիակ է հայտնաբերվել։ Ամենայն հավանականությամբ նրան սպանել են։
Նախնական տվյալով` երեխայի դայակը` Միջին Ասիայի երկրներից մեկի քաղաքացին, սպասել է մինչև երեխայի ծնողներն իրենց ավագ որդու հետ դուրս կգան բնակարանից, այնուհետև «անհայտ պատճառով սպանել է երեխային, հրդեհել տունը և հեռացել բնակարանից»։ Կինը ձերբակալված է։
ՌԴ նախագահին առընթեր երեխայի իրավունքների պաշտպան Պավել Աստախովն այս դեպքը «հրեշավոր ու անբացատրելի սպանություն» է որակել։
«Մոսկվայում հերթական վայրագ սպանությունն է գրանցվել, որը ենթադրաբար իրականացրել է երեխայի դայակը։ Հրեշավոր է և անբացատրելի։ Կասկածյալը ձերբակալվել է ոստիկանների աչալրջության շնորհիվ»,- գրել է նա Twitter-ի միկրոբլոգում։
