ԵՐԵՎԱՆ, 28 փետրվարի — Sputnik. Գյումրիում նախօրեին մեկնարկած հանգանակության մասին ոչ պաշտոնական տեղեկատվություն է ներկայացրել քաղաքապետարանի ավագանու անդամ, «Ասպարեզ» ակումբի նախագահ Լևոն Բարսեղյանն իր ֆեյսբուքյան էջում։
Գյումրիում երեկ աշխարհահռչակ ջազ դաշնակահար Տիգրան Համասյանի բարեգործական համերգի ընթացքում սկսվել էր հանգանակություն` տնակներում բնակվող 13 ընտանիքի բնակարանով ապահովելու նպատակով։
Դրամահավաքին մասնակցել են ինչպես հասարակ մարդիկ, այնպես էլ պաշտոնյաներ ու արվեստագետներ, ինչպես` գյուղնախարար Սերգո Կարապետյանը, Գյումրու քաղաքապետ Սամվել Բալասանյանի ընտանիքը, դերասան Հայկ Մարությանը:
«Այլ փոխանցումների մասին պարզ կլինի երկուշաբթի։ Հանգանակության մանրամասները կազմակերպիչները կհրապարակեն ավելի ուշ»,- նշել է Բարսեղյանը:
Նախատեսվում է մինչև մարտի քսանը հանգանակել 120.000 ֆունտ ստերլինգ` անգլիական www.crowdfunder.co.uk կայքի միջոցով մեկնարկած ակցիային։ Գաղափարն իրագործելու համար կազմակերպվում են ամենատարբեր միջոցառումներ, որոնցից մեկը «Երևանը` Գյումրիի կողքին» խորագրով է լինելու:
