ԵՐԵՎԱՆ, 28 փետրվարի — Sputnik. Լոնդոնի Timeline Auctions աճուրդում ռեկորդային` 297,6 հազար ֆունտով (420 000 դոլար) վաճառվել է Ֆրանսիայի ազգային հերոս Ժաննա դ'Արկի արծաթե մատանին, հաղորդում է gazetadaily պարբերականը:
Այդ մատանու համար պայքարում էին տասնյակ կոլեկցիոներներ ոչ միայն սրահում ներկաներից, այլև հեռախոսով և համացանցով աճուրդին մասնակցողներից:
Նախնական արժեքի վերին սահմանը գնահատվել էր 14 000 ֆունտ, սակայն աճուրդի արդյունքում վաճառքի գումարը մի քանի տասնյակ անգամ գերազանցեց նախնական արժեքը` կազմելով 297 600 ֆունտ ստերլինգ:
15-րդ դարի մատանին համապատասխանում է հարցաքննությունների ժամանակ Ժաննայի տված նկարագրությանը, այդ գրառումները պահպանվել են արխիվներում: Մատանին տեղադրված է կաղնու փայտից պատրաստված զարդատուփի մեջ` դրա իսկության և պատկանելության մասին փաստաթղթերով։ Jhesus Maria գրառումով և 3 խաչով մատանին ենթադրաբար նրան նվիրել են ծնողները:
