ԵՐԵՎԱՆ, 26 փետրվարի — Sputnik. ՀՀ ՊՆ, ԶՈՒ, ԶՈՒ ԳՇ վարչությունների և առանձին բաժինների զինծառայողներն ու քաղաքացիական հատուկ ծառայողները ստացան համապատասխան ազդանշանն ու սահմանված ժամանակահատվածում և համապատասխան հանդերձանքով ներկայացան ծառայության վայր:
Հանկարծակի ստուգման նպատակն էր ստուգել զինծառայողների և քաղաքացիական հատուկ ծառայողների մարտական և զորահավաքային պատրաստականության աստիճանը, նրանց ֆունկցիոնալ պարտականությունների և մասնագիտական գիտելիքների իմացության, դրանք ըստ անհրաժեշտության կիրառելու աստիճանը:
ՀՀ ՊՆ վարչական համալիրի շարահրապարակում անձնակազմին ողջունեց ՀՀ պաշտպանության նախարար Սեյրան Օհանյանը և ընդգծեց զինված ուժերում պլանային և արտապլանային միջոցառումների, մարտավարաշարային պարապմունքների անցկացման և անձնակազմի զգոնության աստիճանը մշտապես բարձր պահելու կարևորությունը:
«Յուրաքանչյուր զինծառայող և քաղաքացիական հատուկ ծառայող պետք է պատրաստ լինի կարճ ժամանակահատվածում առաջադրվող խնդիրների կատարմանը և ունակ լինի դրսևորելու համակարգված մոտեցում, մասնագիտական բարձր պատրաստվածություն»,- շեշտեց նախարարը և որոշակի ցուցումներ ու հանձնարարականներ տվեց պաշտպանության նախարարության և ԶՈՒ գլխավոր շտաբի կենտրոնական ապարատի անձնակազմին:
