ԵՐԵՎԱՆ, 26 փետրվարի — Sputnik. Մոսկվայի միջնորդ դատարանն ընդունել է երգչուհի Ալլա Պուգաչովայի հայցն ընդդեմ Future Star ընկերության։ Ընկերության գլխավոր տնօրենը «Ֆաբրիկա զվյոզդ» հեռուստանախագծի մասնակից Իրսոն Կուդիկովան է (իսկական անունը` Իրինա Նուսինովա)։
Հայցը դատարան է ներկայացվել փետրվարի 24-ին։ Հայցի վերաբերյալ մանրամասները հայտնի չեն։
Իրավաբանական անձանց միասնական պետական ռեգիստրի տվյալով` Future Star ընկերությունը հիմնել են Պուգաչովան ու Նուսինովան 2013 թվականին։ Ընկերությունը հիմնականում զբաղվում է երեխաների լրացուցիչ կրթության հարցերով։ Լրատվամիջոցներն այս դպրոցը սովորաբար անվանում են «Ալլա Պուգաչովայի դպրոց»։
Պուգաչովայի նախորդ հայցի համաձայն` Մոսկվայի դատարանը 2015 թվականի սեպտեմբերին Նուսինովայից արդեն գանձել էր ավելի քան 200 հազար դոլար, 7 մլն ռուբլի, ինչպես նաև 2.5 մլն ռուբլու ու 57 հազար դոլարի չափով տույժ և տոկոսներ, ՌԻԱ Նովոստիին են հայտնել դատարանից։
Մի շարք ԶԼՄ-ների տեղեկությունների համաձայն` Պուգաչովան ու Կուդիկովան անտոկոս փոխառության պայմանագիր են կնքել։ Կուդիկովան պարտքը պետք է վերադարձներ 2014 թվականի դեկտեմբերին։ Պուգաչովան տարածքային դատարան է դիմել այն ժամանակ, երբ գումարը չի վերադարձվել սահմանված ժամկետում։
Կուդիկովան երգչուհի է, սաքսոֆոնահար, երաժշտական պրոդյուսեր, դերասանուհի, մասնակցել է Ալլա Պուգաչովայի «Ֆաբրիկա զվյոզդ-5» հեռուստանախագծին։
