ԵՐԵՎԱՆ, 25 փետրվարի — Sputnik. Թուրքիայի և «Իսլամական պետության» համագործակցության մասին լուրը փոփոխություն է մտցրել ԱՄՆ-ի քաղաքականության մեջ, Sputnik Արմենիային ասաց ԱԺ արտաքին կապերի մշտական հանձնաժողովի անդամ Թևան Պողոսյանը` մեկնաբանելով Sputnik-ի հարցախույզի արդյունքները։
Հարցախույզի տվյալների համաձայն` ֆրանսիացիների 72%-ը կարծում է, որ Թուրքիան աչք է փակում Սիրիայում «Իսլամական պետության» հետ նավթի առևտուր անող թուրք վաճառականների գործունեության վրա: Գերմանացիների կեսից ավելին (52%), ամերիկացիների 38%-ը և անգլիացիների 41%-ը համոզված են, որ նավթի վաճառքը թուրքական իշխանության թույլտվությամբ է իրականացվում:
«Եվրոպացիների և ամերիկացիների ցուցանիշների տարբերությունը կապված է այն տեղեկատվության հետ, որը վերլուծական կենտրոնները ներկայացնում են հասարակությանը։ Ամերիկայում այսօր նախընտրական պայքար է ընթանում, դա է պատճառը, որ մամուլն ավելի շատ անդրադարձել է ներքին խնդիրներին»,- ասաց Պողոսյանը։
Պատգամավորը կարծում է, եթե անգամ դիտարկում անցկացվի, թե հայկական տպագիր մամուլն ինչ հոդվածներ է հրապարակել` հղում անելով ամերիկյան աղբյուրներին, կարելի է նկատել, որ շատ ակտիվորեն են անդրադառնում Թուրքիայի և ԻՊ-ի համագործակցության հարցին։ Այդ նյութերը կան, այլ հարց է` արդյո՞ք հիմա այդ թեման հետաքրքրում է ամերիկացիներին, թե՞ նրանք ավելի շատ զբաղված են ներքին հարցերով։
Պողոսյանի խոսքով` ԱՄՆ-ն շատ լավ գիտի, որ Թուրքիան ու ԻՊ-ն համագործակցում են, դրա վկայությունն է նաև Թուրքիայի նախագահ Ռեջեփ Էրդողանի հայտարարությունը։
«Եթե լսենք Էրդողանին, ապա Ռուսաստանը, ԵՄ-ն, ԱՄՆ-ն ու ՄԱԿ-ը միավորվել են Թուրքիայի դեմ ու երկրի նկատմամբ ոչ ճիշտ քաղաքականություն են վարում։ Եթե պետդեպարտամենտն ու ԱՄՆ-ի պաշտպանության նախարարությունը նման տեղեկություն չունենային, կհամագործակցեին արդյո՞ք մյուս երկրների հետ` մի կողմ թողնելով իրենց դաշնակցին», — հռետորական հարց է ուղղում Պողոսյանը։
