ԵՐԵՎԱՆ, 25 փետրվարի — Sputnik. ՀՅԴ-ի իրականացրած ակտիվ աշխատանքը ժողովրդի օգտին կլինի, Ազգային ժողովում լրագրողներին ասաց ՀՅԴ խմբակցության ղեկավար Արմեն Ռուստամյանը։
Նա կտրականապես հերքեց այն խոսակցությունները, որ կուսակցության գործողություններն ուղղված են 2017 թվականի ընտրությունների նախապատրաստմանը։
«Եթե մենք քվեների հարց լուծեինք, մենք պատասխանատվություն չէինք ստանձնի։ Որոշ ընդդիմադիրների պես մենք կարող էինք հպարտությամբ մի կողմ կանգնել ու քննադատել բոլորին։ Ավելի լավ է` մենք սկսենք աշխատել, ու միանգամից պարզ կդառնա, թե ով է խոսում, ով` աշխատում»,- ասաց Ռուստամյանը։
Նա անդրադարձավ նաև վարչատարածքային բաժանումներին վերաբերող կետին, որը նշված է ՀՀԿ-ի հետ կնքած համաձայնագրում։
«Կբերվի հստակ ռազմավարություն: Մենք կարծում ենք, որ պետք է վերանայվեն բաժանումները` մարզերի հետ կապված, ճիշտ սահմաններ պետք է ունենանք, անցում պետք է կատարվի, և այդ անցումը կամաց-կամաց կատարվում է: Նոր ձևով ձևավորել ավագանիները, համայնքները և այլն: Սրանց մասին է խոսքը: Երևանում ընտրվում է ավագանի, որից ձևավորվում է քաղաքապետարանը, իսկ վարչական տարածքների ղեկավարները նշանակվում են: Ես կարծում եմ, որ 950 համայնքը փոքր երկրի համար շատ է, պետք է համայնքների քանակը կրճատվի»,- ասաց Ռուստամյանը։
Լրագրողներին հետաքրքրում էր, թե ով է խորհրդարանում փոխարինելու նախօրեին էկոնոմիկայի նախարար նշանակված Արծվիկ Մինասյանին։ Ռուստամյանի խոսքով` նրան կփոխարինի ՀՅԴ համամասնական ցուցակում ընդգրկված հաջորդ անձը`Կարեն Շահմուրադյանը։
Այն հարցին, թե ինչպես է նա վերաբերվում ՀԱԿ-ի այն առաջարկին, որ մարտի 1-ը պետք է հիշատակի օր սահմանվի, Ռուստամյանն ասաց, որ ինքն առանց այդ էլ հիշում է մարտի 1-ը։
«Հայ ազգային կոնգրես» խմբակցության կողմից շրջանառության մեջ է դրվել Տոների և հիշատակների օրերի մասին ՀՀ օրենքում լրացում կատարելու մասին օրենքի նախագիծը, որով առաջարկվում է Մարտի 1-ը նշել որպես 2008թ. մարտի 1-ի զոհերի հիշատակի և պետական ահաբեկչության ու բռնաճնշումների դեմ համազգային բողոքի օր:
«Ես միշտ եմ հիշում մարտի 1-ը, քանի որ իմ ծննդյան օրն է, սակայն այդ օրինագծի հետ կապված` մենք որևէ խնդիր չունենք»,- ասաց Ռուստամյանը։
