ԵՐԵՎԱՆ, 24 փետրվարի-Sputnik. Տնտեսագետ Կառլեն Խաչատրյանը ներկայացրեց մի շարք երկրների փոխարժեքի տատանումները։ Օրինակ` հարևան Ադրբեջանում մանաթն արժեզրկվել է մոտավորապես 105 տոկոսով, ուկրաինական գրիվնան` 200, իսկ վրացական լարին 40 տոկոսով։
«Հայաստանում այս իմաստով դրական միտում է նկատվում։ Կենտրոնական բանկը լողացող փոխարժեքի քաղաքականություն է որդեգրել, ինչը ենթադրում է, որ ազգային արժույթի փոխարժեքը որոշվում է առավելապես պահանջարկի ու առաջարկի հարաբերակցությամբ»,-ասաց տնտեսագետը։
Կառլեն Խաչատրյանն ավելացրեց, որ 2015 թվականին արդյունաբերության ու գյուղատնտեսության ոլորտում Հայաստանում արտահանման աճ է արձանագրվել։ Դա դոլարային մուտքեր է ապահովել երկիր, և դոլարի առաջարկը տնտեսության մեջ մեծացել է։ Մասնակիորեն կրճատվել են տրանսֆերտները։
«2015 թվականին մեր երկրում օտարեկրյա ներդրումների ծավալն աճել է։ Ըստ էության, նշված գործոններն են պատճառը, որ մեր երկրում դոլարն առանձնակի մեծ չափով չի արժևորվել դրամի նկատմամբ»,-իր խոսքը եզրափակեց Կառլեն Խաչատրյանը։
