ԵՐԵՎԱՆ, 24 փետրվարի- Sputnik. Հայաստանի հանրապետական կուսակցությունն ու Դաշնակցությունը փետրվարի 24-ին համաձայնագիր կստորագրեն քաղաքական համագործակցության մասին, Ազգային ժողովում լրագրողներին ասաց ՀՅԴ խմբակցության ղեկավար Արմեն Ռուստամյանը:
«Համաձայնագիրը կստորագրվի այսօր, մանրամասները հասարակությանը կներկայացվեն ստորագրումից հետո»,- ասաց Ռուստամյանը: Նա առաջարկեց ԶԼՄ-ներին հետևել բոլոր այն կետերի կատարմանը, որոնք կհամաձայնեցվեն ՀՀԿ-ի հետ:
Ինչ վերաբերում է այն հարցին, թե ով կփոխարինի պատգամավոր Արծվիկ Մինասյանին (նա կգլխավորի էկոնոմիկայի նախարարությունը), ապա ՀՅԴ-ում դեռ չեն կողմնորոշվել:
Համաձայնագրով ենթադրվում է, որ տարածքային կառավարման նախարարի պաշտոնից բացի, Դաշնակցությանը կհատկացվի ևս երկու նախարարական պորտֆել՝ կրթության և գիտության, էկոնոմիկայի նախարարների պաշտոնները:
