ԵՐԵՎԱՆ, 23 փետրվարի- Sputnik. Ամերիկյան Mars կոնցերնը ետ է կանչել իր արտադրանքն աշխարհի 55 երկրից այն բանից հետո, երբ ընկերության շոկոլադում հայտնաբերվել են պլաստիկի կտորներ։
Ավելի վաղ հաղորդվել է ԳԴՀ-ից Mars, Snickers, Milky Way և Celebrations քաղցրավենիքը ետ կանչելու մասին։ Հետո տեղեկություններ են հայտնվել Եվրամիության մի շարք երկրներից, այդ թվում` Ֆրանսիայից և Մեծ Բրիտանիայից նույն արտադրանքը ետ կանչելու մասին։
ԶԼՄ-ների տվյալներով` խոտանված շոկոլադե սալիկներն արտադրվել են տարեսկզբին Նիդեռլանդներում։ Այդ երկրում Mars-ի ներկայացուցիչը հաղորդել է Ասոշիեյթեդ Փրես գործակալությանը, որ արտադրանքը ետ է կանչվել աշխարհի 55 երկրից։
Սննդամթերքի որակի հսկողության հոլանդական վարչության տվյալներով` ետ կանչվող արտադրանքի մեջ մտնում է Mini Mix տեսականին։ Վերահսկիչ մարմինը նախազգուշացնում է, որ կոնֆետներում պլաստիկի կտորները կարող են հանգեցնել շնչահեղձության։
Գերմանիայում ետ կանչվող արտադրանքի տեսականին 2016թ.-ի հունիսի 19-ից մինչև 2018թ.-ի հունվարի 8-ը ժամկետի մեջ գտնվող ապրանքն է։
