ԵՐԵՎԱՆ, 23 փետրվարի — Sputnik. Պավլիկ Կավալենկոն ծառայել է Խորհրդային բանակում՝ Ուկրաինայում, ու թեև դեռ չէր հասցրել հարազատներից շնորհավորանքներ ստանալ տոնի առթիվ, ամեն դեպքում, այս տոնը համարում է նաև իրենը:
«Ծառայել եմ Ուկրաինայում: Շատ լավ եմ հիշում այդ տարիները: Ծառայությունից հետո այդ օրը ամրագրվել է իմ հիշողության մեջ, ու ես շատ հարազատ տոն եմ համարում փետրվարի 23-ը: Խորհրդային բանակը շատ բան տվեց ու շատ բան սովորեցրեց մեզ»,-նշեց Պավլիկ Կավալենկոն:
Ծառայության տարիները մեծ ոգևորությամբ հիշեց նաև Մհեր
Գալստյանը:
«Ուսուրիյսկում եմ ծառայել ավելի քան 2 տարի: Շատ լավ էր, միշտ հպարտությամբ եմ հիշում այդ տարիները: Նույնիսկ այնքան լավ էր, որ ծառայությունից չէի ուզում հետ գալ, թեև ծառայակից ընկերներիս մեջ հայ չկար, փոխարենը կարոտն էր, բայց դա էլ չէր խանգարում ինձ: Մենք խորհրդային դաստիարակություն ենք ստացել, և փետրվարի 23-ին ես ավելի շատ եմ սպասում ու կնոջիցս շնորհավորանք հենց այս օրն եմ ստանում, իսկ հունվարի 28-ն իմ մեջ չի մտել հավանաբար այն պատճառով, որ չեմ ծառայել Հայկական բանակում: Հունվարի 28-ը նոր սերնդի Հայրենիքի պաշտպանի տոնն է»,-նշեց Մհեր Գալստյանը:
Փետրվարի 23-հունվարի 28 ընտրությունը սխալ և ոչ տեղին է համարում Պարգև Կուրխինյանը:
«Այդ հարցը ճիշտ չէ։ Մենք գնահատում ենք մեր անցած 25 տարիների անկախության ուղին, անցած ճանապարհը, պետությունն ու բանակը, բայց չպետք է մոռանանք մեր անցյալը: Մենք անցյալ ունենք ու այդ անցյալով մեր ներկան ենք ստեղծում: Թող ոչ մեկը չմոռանա իր պապերի ու հայրերի անցածը՝ հաղթանակն ու փետրվարի 23-ը, որը Խորհրդային Միության բանակի ստեղծման տարեդարձն է, մեր՝ հին սերնդի համար կարոտալի ու բաղձալի իրադարձություն է, որը մենք չենք կարող մոռանալ: Ինձ համար փետրվարի 23-ը նույնչափ կարևոր է, որքան հունվարի 28-ը»,-հավելեց Պարգև Կուրխինյանը:
Ամեն դեպքում սա այն տոնն է, երբ ցանկացած տղամարդ, նույնիսկ նա, ով չի ծառայել, ներքուստ սպասում է շնորհավորանքի՝ կնոջից, մորից կամ ընկերուհուց: Սա եզակի օրն է տարվա մեջ, ծննդյան օրվանից բացի, երբ կանայք իրենք են ամուսինների համար նվեր գնում:
Գյումրեցի շատ տղամարդիկ կարծում են՝ իրենց միամսյակն ունեցող կանայք պետք է շռայլ գտնվեն գոնե այս հարցում և սիրելիներին համբույրներ ու նվեր ընծայեն այս երկու տոներին էլ:
