ԵՐԵՎԱՆ, 23 փետրվարի- Sputnik. Թուրքիայի Իզմիր նահանգի բնակիչը դատարանում հայց է ներկայացրել իր կնոջ դեմ, ով, նրա խոսքով, վիրավորել է երկրի նախագահ Թայիպ Էրդողանին, հաղորդում է ՌԻԱ Նովոստին` հղում անելով Yeni Safak թերթին։
Նախկինում Թուրքիայի քաղաքացիների, այդ թվում` լրագրողների դեմ տասնյակ հայցեր են ներկայացվել Էրդողանին վիրավորելու մեղադրանքով։ Նախագահին վիրավորելու համար թուրքական օրենքով նախատեսվում է տուգանք կամ 1-4 տարի ազատազրկում։
Հայցորդ Ալի Դ.-ն` որպես իր խոսքերի ապացույց, ներկայացրել է իր կնոջ խոսքերի ձայնագրությունը, որոնք նա ասել է Էրդողանի հասցեին նրա հեռուստաելույթներից մեկի ժամանակ
«Ես հայց կներկայացնեի անգամ իմ հոր դեմ, եթե նա վիրավորեր նախագահին»,- մեջբերում է թերթը հայցորդին։
Հաղորդվում է, որ կինը, իմանալով, որ ամուսինը դատական հայց է ներկայացրել իր դեմ, ցանկանում է ամուսնալուծվել։
