ԵՐԵՎԱՆ, 23 փետրվարի- Sputnik. Թեև Հայաստանում Բանակի օրը նշվում է հունվարի 28-ին, փետրվարի 23-ը` որպես տղամարդկանց տոն, ոչ ոքի չի խանգարում, ասաց Միքայելյանը։
«Հիշում եմ` ինչպես Խորհրդային Միության տարիներին նույնիսկ զոքանչս ինչ-որ բան էր նվիրում փետրվարի 23-ի առթիվ։ Իսկ դպրոցում մենք մեծ շուքով էինք տոնում, աղջիկները նվերներ էին տալիս մեզ»,- պատմեց նա։
Միքայելյանը պատմեց նաև, թե ինչպես ամեն տարի տղաները սպասում էին աղջիկների նվերներին, որպեսզի մարտի 8-ին նրանց համար ավելի լավ նվեր պատրաստեն։
Նա նշեց, որ ԽՍՀՄ տարիներին փետրվարի 23-ը Խորհրդային բանակի օրն էր, բայց հիմա շատերն այն տոնում են որպես տղամարդկանց տոն։
«Շնորհավորում եմ հզոր ռուսական բանակի տղաներին, ինչպես նաև հայ զինծառայողներին։ Չնայած նրան, որ Հայաստանը նշում է Բանակի օրը հունվարի 28-ին, փետրվարի 23-ը ոչ ոքի չի խանգարում։ Կարծում եմ, որ Հայաստանում կարող են թեկուզ տարին մեկ անգամ նշել տղամարդկանց տոնը»,- ասաց Ղարաբաղյան պատերազմի վետերանների միության նախագահը։
Միքայելյանը հավելեց, որ դա շատ նշանակալի և գեղեցիկ օր է, և ինքը կցանկանար, որպեսզի փետրվարի 23-ն ավանդական տոն դառնար հայերի համար։
Իսկ ահա նախկին հետախույզ, հատուկ ջոկատային Վովա Վարտանովը թեև հարգում է փետրվարի 23-ը և շնորհավորում բոլոր նրանց, ում մոտ այդ օրը պետական տոն է, բայց կարծում է, որ այն բոլորովին էլ հայկական չէ։
«Ինձ այսօր նույնպես շնորհավորել են, քանի որ ես ծառայել եմ Խորհրդային բանակում։ Բայց որդիներիս չեմ շնորհավորում, որովհետև նրանք անկախ Հայաստանի քաղաքացիներ են»,- ասաց Վարտանովը։
Նախկին հետախույզը հավելեց, որ ինքը և Յուրի Միքայելյանը հանդիպման ժամանակ ողջագուրվել են, բայց չեն շնորհավորել միմյանց այս տոնի կապակցությամբ։
Նրա խոսքով` սա հայկական տոն չէ և Հայաստանի համար այն ավանդական տոն չէ, նույնքան «մտացածին» է, որքան մարտի 8-ը։ Միքայելյանը կարծում է, որ ավանդական և նույնանման հայկական տոներ են ապրիլի 7-ը (Մայրության և գեղեցկության տոնը) և փետրվարի 28-ը (Հայոց բանակի օրը)։
