ԵՐԵՎԱՆ, 23 փետրվարի-Sputnik. Հայաստանի Ազգային ժողովն ընտրեց նոր օմբուդսմենին։ Քվեարկության դրվեց ՀՀ արդարադատության փոխնախարար Արման Թաթոյանի թեկնածությունը։ Քվեարկությանը մասնակցեց 107 խորհրդարանական, 4 քվեաթերթիկ անվավեր ճանաչվեց, կողմ քվեարկեց 96, դեմ` 7 պատգամավոր։
Խորհրդարանի կանոնակարգի համաձայն` օմբուդսմենին ընտրելու համար հարկավոր էր 79 ձայն (ձայների 3/5-ը)։
Գաղտնի քվեարկությունն անցկացվեց առանձին սրահում, որտեղ քվեատուփեր էին դրվել, և պատգամավորները հերթով մոտեցան քվեարկելու։
Չնայած քվեարկության գաղտնիությանը` մի շարք կուսակցություններ և պատգամավորներ ներկայացրին իրենց դիրքորոշումը։ Կողմ է հանդես եկել ՀՀԿ-ն (ինչը բնական է, քանի որ Արման Թաթոյանն իրենց թեկնածուն է) և նոր քաղաքական գործընկերը` ՀՅԴ-ն։
«Բարգավաճ Հայաստան» և «Ժառանգություն» կուսակցությունները հորդորել են իրենց խմբակցությունների անդամներին ինքնուրույն որոշում կայացնել։
Հայ ազգային կոնգրեսը նախօրոք հայտարարել է, որ չի մասնակցի ընտրություններին։ ՀԱԿ պատգամավոր Նիկոլ Փաշինյանն էլ հայտարարել է, որ կողմ է Թաթոյանի թեկնածությանը։
